DILI, 12 jullu 2022 (TATOLI)—Xefe Bankada Fretilin iha Parlamentu Nasionál, David Dias Ximenes ‘Mandati’, hateten bankada Fretilin fó votu a-favór ba pedidiu Prezidente Repúblika (PR), José Ramos Horta, vizita Indonézia tanba interese Estadu ka interese nasionál.
Notísia Relevante: PN aprova pedidu PR Horta vizita Indonézia ho unanimidade
“Prezidente Repúblika reprezenta Estadu, nune’e vizita ne’e ba interese Estadu ni’an la’ós pesoál, nein partidu ninian ka grupu nian tan ne’e bankada Fretilin tenke vota a-favór,” Xefe Bankada FRETILIN ne’e hateten ba Agência Tatoli, iha Parlamentu Nasionál, tersa ne’e.
Nia hatutan, labele halo tuir fali uluk vota kontra ba viajen sira pedidu Xefe Estadu nian mai iha Parlamentu Nasionál ne’e maibé tenke separa saida mak partidu no saida mak Estadu.
“Ita labele halo tuir hanesan uluk. Ne’ebé, ita tenke separa saida mak partidu no saida mak Estadu. Partidu ne’e hanesan meiu ida atu ita asegura ita-nia Estadu, labele lori fali partidu destroi Estadu, ne’e la loos,” nia hateten.
Vise bankada CNRT, Patrocínio Fernandes, hateten desizaun ne’ebé reprezenta órgaun Parlamentu Nasionál fó, ida-ne’e hatudu kria relasaun servisu di’ak ho Prezidente Repúblika.
“Hanoin bankada Governu agora sé mak reprezenta órgaun tolu. Ne’ebé, segundu órgaun buka servisu hamutuk ho Prezidente Repúblika no bankada Governu ne’ebé sustenta hanoin katak kria di’ak liután relasaun ho bankada Governu ho Prezidente Repúblika,” nia dehan.
Ne’ebé nia-parte laiha buat seluk atu halo espekulasaun makaas, ne’ebé normál desizaun ida deputadu ida-idak nian iha duni responsabilidade hodi fó votu a-favór.
Antes ne’e, Xefe Bankada KHUNTO, Olinda Guterres, hateten tenke fó votu a-favór ba pedidu vizita Xefe Estadu nian tanba PR reprezenta Estadu no povu Timor-Leste.
Notísia Relevante: PN La Autoriza Assentimentu Dezlokasaun PR Ba Roma
Jornalista : Nelson de Sousa
Editór : Cancio Ximenes
