DILI, 12 jullu 2022 (TATOLI)—Grupu soru tais 10 hosi Rejiaun Administrativa Espesiál Oé-Cusse Ambeno (RAEOA), tersa ne’e, hato’o preokupasaun ba Parlamentu Nasionál tanba de’it Governu halibur tiha sira-nia tais maibé la konsege aprezenta iha Expo Dubai.
Preokupasaun ne’e hato’o direta ba iha membru Deputuu sira iha uma fukun Parlamentu Nasionál hodi hato’o direta ba deputadu/a sira iha sala bankada CNRT, tanba de’it Governu liuhosi Sekretária Estadu Igualdade no Inkluzaun (SEII) ho Ministériu Komérsiu no Indústria (MTKI) koordena ho sira halibur tais 317, atu lori ba Expo Dubai maibé Governu rai de’it iha kontentór laran to’o tinan ida.
“Governu hateten kontentór uluk ba ona tanba ne’e sei hein fali kontentór segundu atu lori ba Expo Dubai mak kontaktu atu bele halo akordu. Maibé ikus mai, tinan ida simu kontaktu dehan mai atu foti fali ami-nia tais. Iha momentu ne’ebá, SEII ba halo kooperasaun ho ami atu halo produsaun tais maibé ikus mai sira ba Dubai la promove ami nia tais,” Koordenadora Grupu Feto Dezenvolve Soru Tais hosi RAEOA, Maria Tapo, hateten ba jornalista sira iha uma fukun Parlamentu Nasionál.
Nia dehan, sira-nia parte iha grupu 10 hodi abandonadu, kbiit laek, durante ne’e hala’o atividade hetan emprestimu osan hosi banku, nune’e ho situasaun refere sente defisíl liután.
“Ami grupu 10 prodós tais kuantidade 300-resin la’ós uza osan rasik maibé kreditu fali osan h’si Kaebauk balun foti $500 hodi sosa materiál, ikus mai tais ne’e la lori ba Expo Dubai halo ami osan laiha atu selu sira, entaun balun ba foti ami-nia rai no balun ba foti ami-nia animál hakiak,” nia dehan.
Bazea ba preokupasaun ne’e, reprezentante povu hosi RAEOA, Lucia Taeci, lamenta ho ekipa Expo Dubai ne’ebé hikar no rai di’ak tais hamutuk 317 ne’ebé tuir planu atu ba aprezenta iha Expo Dubai maibé realidade la konsege lori no aprezenta.
“Iha Expo Dubai ida-ne’e hau triste tebes tanba Governu laiha responsabilidade tanba Sekretária Estadu Igualidade no Inkluzaun (SEII) ho Ministéiru Komersíu no Indústria (MTKI) koordena ho sira Oé-Cusse liu-liu sira soru tais na’in hodi tais hamutuk 317 ne’e iha tais kiik no boot, kuaze tinan ida ona tais ne’e la ba Dubai. Maibé tau hela iha kontentór laran no ita-nia inan-feton sira-ne’e hanoin hela dehan sira-nia tais ba ona Dubai sei simu osan. Maibé realidade semana kotuk sira hosi Oé-Cusse atu mai simu osan maibé la simu osan, simu fali sira-nia tais. Ida-ne’e kestionavel tebes,” nia hateten.
Jornalista : Nelson de Sousa
Editór : Cancio Ximenes
