DILI, 12 jullu 2022 (TATOLI)—Ministru Administrasaun Estatál (MAE), Miguel Pereira de Carvalho, hateten Governu liuhosi Ministériu Administrasaun Estatal (MAE) sei garante susesu programa desentralizasaun iha benefísiu ba sidadaun Timor-Leste.
Notísia Relevante: Komisaun A-MAE deskute projetu-lei eleitorál munisipál-desentralizasaun administrativa
“MAE ho Autoridade Administrasaun Munisipál konsiente ba importánsia rekursu fundamentál no kontinua valoriza ho métodu garante susesu ba programa desentralizasaun iha benefisiu ba sidadaun hotu iha Timor-Leste,” Governante ne’e hateten ba jornalista sira, hafoin halo abertura ba semináriu ho tema “Desentralizasaun Administrativu no Poder Lokál iha ámbitu komemorasaun aniversáriu funsaun públika ba dala-ualu”, iha Ministériu Finansa, Dili.
Governante ne’e hatutan, konstrusaun ba dezenvolvimentu sustentável hodi forma no asegura futuru ba progresu armonia ne’ebé di’ak ba futuru jerasaun nian, nune’e nia husu ba dirijente no funsionáriu hotu atu partisipa ho másimu iha semináriu ne’e, tanba ida-ne’e bele haforsa no hakbiit servidór Estadu sira.
Vise Ministru Administrasaun Estatál (MAE), Lino de Jesus Torrezão, hateten atu halo desentralizasaun mak tenke desentraliza kompeténsia mai iha kraik mak presiza hala’o faze tolu mak hanesan deskonsentrasaun administrativa territoriál, desentralizasaun administrativa institusionál no desentralizasaun administrativa territoriál.
“Entaun ita atu hetan desentralizasaun administrativa territoriál mak ita hetan ona ita-nia reprezentante iha kraik mak ita planea ona ba 2024,” Lino hateten.
Kona-ba rekursu umanu, nia dehan aban bainrua sei loke vaga tanba presiza duni rekursu umanu hodi hala’o servisu iha administrativa territoriál.
“Ita sei loke vaga ba ema tanba bainhira implementa desentralizasaun administrativa territoriál mak presiza funsionáriu no aban bainrua kuandu buat hotu la’o loos, ita sei destaka funsionáriu munisípiu nian iha nasionál. Kuandu lei poder lokál la’o ona no lei eleisaun asembleia la’o ona,” nia dehan.
Notísia Relevante: Polítika desentralizasaun administrativa promove instituisaun Estadu ida forte
Jornalista : Osória Marques
Editór : Cancio Ximenes
