Membru PN lamenta Governu la aprezenta tais RAEOA iha Expo Dubai

DILI, 12 jullu 2022 (TATOLI)—Membru Parlamentu Nasionál (PN) lamenta ho Governu liu-liu ekipa Expo Dubai ‘budu’ tais hamutuk 317 hosi grupu 10 hosi Rejiaun Administrativa Espesiál Oé-Cusse Ambeno (RAEOA) ne’ebé tuir planu atu ba aprezenta iha Expo Dubai maibé realidade la konsege.

Notísia Relevante: Grupu soru tais 10 hosi RAEOA hato’o preokupasaun ba PN

“Iha Expo Dubai ida-ne’e ha’u triste tebes tanba Governu laiha responsabilidade tanba Sekretária Estadu Igualidade no Inkluzaun (SEII) ho Ministéiru Komersíu no Indústria (MTKI) koordena ho sira Oé-Cusse liu-liu sira soru tais na’in hodi tais hamutuk 317 ne’e iha tais kiik no boot, kuaze tinan ida ona tais ne’e la ba Dubai. Maibé tau hela iha kontentór laran no ita-nia inan-feton sira-ne’e hanoin hela dehan sira-nia tais ba ona Dubai sei simu osan. Maibé realidade semana kotuk sira hosi Oé-Cusse atu mai simu osan maibé la simu osan, simu fali sira-nia tais.Ida-ne’e kestionavel tebes,” Reprezentante Povu iha PN, Lucia Taeci, levanta iha reuniaun plenária Parlamentu Nasionál, tersa ne’e.

Antes ne’e, ekipa SEII ba iha Oé-Cusse koordena hamutuk ho MTKI lori ona tais sira-ne’e hosi inan-feton sira atu lori ba aprezenta iha Expo Dubai maibé lori tiha to’o iha Dili, la lori ba iha Dubai no rai de’it iha kontentór laran durante tinan ida.

“Laiha responsabilidade se tais ne’e la faan. Pelumenus iha tinan kotuk kuaze fulan ida ka rua kontaktu fali ba ita-nia inan-feton sira bele ba foti fali tais, la’ós tau to’o tinan ida tau iha kontentór. Bainhira sira mai hosi Oé-Cusse ba hasoru komisaun organizadora Expo Dubai foti atu foti osan maibé realidade Governu fó fali sira-nia tais,” nia kestiona.

Antes ne’e, iha fulan hirak liuba nia-parte levanta ona preokupasaun ne’e maibé laiha resposta hosi parte relevante, ho ida-ne’e derepente inan-feton sira-ne’e tenke mai hosi Oé-Cusse mak foti fali tais, maibé situasaun tenke buka osan selu ró hosi rai-ketan mai to’o kapitál nasaun.

“Ita presiza hanoin. Tanbasá ha’u ko’alia hanesan ne’e, iha sira empresta osan atu halo tais ne’e. Maibé tanba sira la selu fali ema-nia osan, ema ba fali sira-nia rai ne’ebé sira hela ba ne’e. Balun, ema ba foti sira-nia animál hakiak tanba laiha osan atu fó fila ema nia tusan. Ida-ne’e ita la hanoin to’o iha ne’e,” Deputadu hosi RAEOA ne’e hateten ho triste.

Fatin hanesan, Deputada PLP, Domingas dos Santos, hateten se ho preokupasaun refere tanba inan-feton sira-ne’e kolen no gasta osan ba hala’o produsaun tais, maibé ikus fali mosu tiha situasaun refere.

“Husu ba reprezentante povu iha uma fukun ida-ne’e, mai ita fó solusaun atu labele halo sira terus ho sira nia tais lakon,” nia hateten.

Deputadu KHUNTO, Luis Roberto, hateten relasiona ho kestaun ne’e liu-liu pesoál ne’ebé iha Ministéiru Turizmu Komérsiu Indústria (MTKI) ho komisaun ida-ne’e, signifika laiha jestaun ka laiha planu ne’ebé fiksu katak hatene raut de’it tais hosi inan-feton sira depois lori no fó fila-fali sira-nia tais.

Deputadu Fretilin, Antonino Bianco, hakarak fó informasaun kona-ba tais tanba karta ida mai ona iha Prezidente Parlamentu Nasionál.

“Karta ida mai ona iha Prezidente Parlamentu esklarese klaru maibé ha’u hakarak dehan de’it iha ninia pontu ida de’it mak ha’u hatete tuir loos Governu sosa balun,” nia dehan.

Hatán ba preokupasaun ne’e, Governu liu hosi Ministru ba Asuntu Parlamentár no Komunikasaun Sosiál (MAPKOMS), Francisco Jeronimo, hateten kona-ba tais bainhira membru PN foti kestaun iha PN parte MAPKOMS halo kedas koordenasaun no haruka kedas karta ba MTKI, hodi haree kestaun ne’e no haruka tiha ona resposta mai iha PN, se seidauk rezolve tan mak sei koordena fila-fali atu bele rezolve problema refere ho lalais.

Jornalista : Nelson de Sousa

Editór       : Cancio Ximenes