MS sei koopera Austrália-Indonézia reforsa LABNAS halo teste kualidade ai-moruk
DILI, 12 jullu 2022 (TATOLI)—Ministériu Saúde (MS) planu atu koopera ho Austrália no Indonézia hodi reforsa Laboratóriu Nasionál Saúde (LABNAS), halo teste ba kualidade ai-moruk, hafoin halo distribuisaun ba fasilidade saúde iha territóriu nasionál.
“Ami nia ekipa tékniku hahú diskute ona, nune’e iha tinan oin (2023) ita tenke halo ona akordu kooperasaun ho nasaun Austrália no Indonézia hodi haforsa Laboratóriu Nasionál Saúde atu iha kapasidade hodi halo teste rasik ba medikamentu sira,” Diretór Nasionál Farmasia no Medikamentu iha Ministériu Saúde, Delfim da Costa Xavier Ferreira, hateten ba Agência TATOLI iha salaun Ministériu Saúde-Caicoli, tersa ne’e.
Notísia relevante: Laiha kualidade, MS apela labele fó aimoruk “dexamethasone no simvastatin” ba pasiente
Ekipa tékniku ne’e kompostu hosi Ministériu Saúde liuhosi Diresaun Nasionál Farmásia no Medikamentu, LABNAS, Servisu Autonómu Médikamentu no Ekipamentu Saúde (SAMES) hahú halo ona diskusaun dala-rua atu ba oin bele hamosu polítika ida hodi fasilita akordu entre nasaun rua ne’e.
Diretór ne’e esplika durante ne’e MS liuhosi SAMES hola ai-moruk no distribui ona ba fasilidade saúde iha territóriu nasionál, mak foin foti nia amostra hodi ba teste iha laboratóriu Austrália.
“Bainhira, ita haruka ba Austrália halo teste mak rezultadu konfirma katak kualidade tuun ka laiha kualidade, entaun ita buka tuir fila-fali ai-moruk ne’ebé ita distribui ona ba fasilidade saúde no to’o estoke ai-moruk balun mamuk tanba fó hotu ona ba pasiente,” nia afirma.
Atu evita situasaun hirak ne’e, nia dehan polítika MS nia ba-oin halo uluk teste kualidade ai-moruk, hafoin halo distribuisaun ba fasilidade saúde sira.
“Kompañia ne’ebé mánan konkursu no halo akizasaun tenke haruka uluk amostra mai atu halo teste nia-kualidade, mak foin bele importa mai iha Timor-Leste no bele distribui ba fasildiade saúde sira,” nia afirma.
Nia afirma, ai-moruk ne’ebé mak distribui ona no teste laiha kualidade ne’e iha impaktu mós prosesu importasaun ne’ebé kle’ur iha ró no aviaun, inklui rai iha armazein SAMES ho kontentór manas bele kontribui ba ai-moruk laiha kualidade,” Diretór ne’e esplika.
Notísia relevante: MS suspende distribuisaun aimoruk “dexamethasone no simvastatin ba fasilidade saúde
Jornalista : Felicidade Ximenes
Editór : Florencio Miranda Ximenes
