PN aprova votu pezár ba falesimentu eis PM Japaun ho eis PR Angola

DILI, 12 jullu 2022 (TATOLI)—Parlamentu Nasionál (PN), aprova votu pezár ba falesimentu eis Primeiru-Ministru (PM) Japaun, Shinzo Abe ho eis Prezidente Repúblika (PR) Angola, José Eduardo dos Santos, ho votu a-favór 59, kontra no abstensaun 0.
“Parlamentu Nasionál aprova ho unanimidade ba falesimentu lidér na’in-rua ne’e iha iha sesaun plenária ne’e,” Prezidente Parlamentu Nasionál, Aniceto Longuinhos Guterres Lopes, hateten iha plenária, Parlamentu Nasionál, tersa ne’e.
Deputadu ne’e hateten, eis PM Japaun envolve iha grupu solidariedade ida hosi Japaun ba luta libertasaun Timor-Leste nian.
Prezidente Bankada, Fretilin, David Dias ‘Mandati’, informa povu Angolano fó mós apoiu iha tempu defisíl iha luta libertasaun nasionál.
“Deputadu sira, ho ida ne’e, ezije fó ita-nia votu pezár ba falesimentu eis Prezidente Repúblika Angola.” nia hateten.
Deputadu Fretilin, José Agostinho Siqueira ‘Somotxo’, lembra katak Timor-Leste simu karta ida hosi Japaun ba solidariedade iha luta libertasaun Timor-Leste nian.
“Simu dokumentu iha 1996 kona-ba solidariedade Japaun, Maibé lahatene envolvimentu ne’e sé-sé mak iha laran, maibé ne’e dokumentu saudozu Nino Conis Santana nian,” nia dehan.
Enkuantu, Eis Primeiru-Ministru Japaun, Shinzo Abe hetan tiru hosi ema deskuñesidu bainhira hato’o hela diskursu hosi Partidu Demokrátiku Liberál, bainhira hala’o kampaña eleisaun parlamentár iha sidade Nara, Japaun, sexta meudia 08 jullu 2022.
Shinzo Abe, moris iha sidade Shinjuku, Tókiu, Japaun iha loron 21 setembru 1954 (67), eleitu sai Primeiru-Ministru Japaun iha tinan 2006 to’o 2007, no re-eleitu hosi tinan 2012 to’o 2020
Jornalista : Nelson de Sousa
Editór : Cancio Ximenes

