VIQUEQUE, 12 jullu 2022 (TATOLI)–Protesaun Sivil munisípiu Viqueque, tersa ne’e, distribui pakote emerjénsia ba vítima inundasaun iha suku Uma-uain Leten, postu administrativu Viqueque vila, munisípiu Viqueque.
“Ohin ami kontinua distribui pakote emerjénsia ba ita-nia vítima inundasaun hosi aldeia rua iha suku Uma-uain Leten, ne’ebé hela iha Beaço,” Koordenadór Protesaun Sivil munisípiu Viqueque, Cerilo Soares Gomes, informa ba Agência Tatoli, iha postu Viqueque vila, tersa ne’e.
Durante akontese inundasaun iha loron 29 juñu 2022, iha uma-kain hamutuk 84 iha aldeia rua, suku Uma-uain, Beaço mak afetadu.
“Antes ne’e, ami distribui uluk ona ba suku Maluro iha Beaço ne’ebé afetadu inundasaun. Ohin ami kontinua distribui pakote emerjénsia ba vítima sira,” nia akresenta.
Notísia relevante: Protesaun Sivil Viqueque sei kompleta pakote emerjénsia hafoin distribui ba vítima
Tuir dadus hosi Protesaun Sivil, inundasaun akontese iha postu Uatucarbau, Uatulari no Viqueque vila, munisípiu Viqueque.
Postu administrativu Uatucarbau iha suku neen mak afetadu inundasaun, kompostu hosi suku Uani-uma iha uma-kain hamutuk 95 mak afetadu, suku Irabin de Baixo iha uma-kain 77, suku Irabin de Cima iha uma-kain lima, suku Loi Ulu iha uma-kain lima, suku Afalokai iha uma-kain 19 no suku Bahata iha uma-kain neen, nune’e totál efetadu hosi postu ne’e hamutuk 207, ne’ebé seidauk simu pakote emerjénsia.
Postu administrativu Uatulari iha suku tolu maka afetadu inundasaun, kompostu hosi suku Afaloikai iha uma-kain 19, suku Babulo iha uma-kain lima no suku Macadique iha uma-kain hitu, ho totál afetadu hamutuk uma-kain 31.
Postu administrativu postu Viqueque vila iha suku neen maka afetadu inundasaun, kompostu hosi suku Maluro iha uma-kain 192, suku Uma-uain Leten iha uma-kain 209, suku Fatudere iha uma-kain 81, suku Luka iha uma-kain 22, suku Uma-Quic iha uma-kain haat, suku Uaimori iha uma-kain ida, ho totál afetadu hamutuk uma-kain 512.
Totál vítima afetadu dezastre naturál iha munisípiu Viqueque hamutuk uma-kain 750 no bazeia ba identifikasaun hosi ekipa iha terrenu, uma-kain hamutuk 75 mak sei hetan materiál konstrusaun uma.
Jornalista : Vitorino Lopes da Costa
Editora : Julia Chatarina
