iklan

EDUKASAUN, HEADLINE

UNPAZ ameasa halo manifestasaun bainhira MESSK hapara klase paralela

UNPAZ ameasa halo manifestasaun bainhira MESSK hapara klase paralela

Magnífiku Reitór UNPAZ, Adolmando Soares Amaral. Imajen TATOLI/Egas Cristovão

DILI, 12 jullu 2022 (TATOLI)–Reitór Universidade da Paz (UNPAZ), Adolmando Amaral, deside klase paralela Rejiaun Administrativu Espesiál Oé-cusse Ambeno (RAEOA) kontinua la’o hanesan baibain.

“Ami-nia atividade prosesu ensinu aprendizajen ba estudante 300 iha RAEOA kontinua la’o hanesan baibain, maibé bainhira Ministériu Ensinu Superiór Siénsia no Kultura (MESSK) deside hapara atividade UNPAZ iha Oé-cusse maka ita sei halo manifestasaun hasoru,” Reitór hateten ba Agência Tatoli, iha kampus sentrál UNPAZ, Osindo 1, Manleuana, tersa ne’e.

Notísia relevante: MESSK hapara atividade klase paralela UNPAZ Oé-cusse

Aleinde ne’e, parte UNPAZ sei hatama prosesu ba Ministériu Públiku atu husu justisa hasoru Ministru hodi hetan esplikasaun foti desizaun taka kampus regular iha Oé-cusse.

Tuir Reitór, dekretu-lei anteriór no dekretu-lei ne’ebé foin lalais hetan aprovasaun iha Konsellu Ministru ne’e fó hela kompeténsia ba Instituisaun Ensinu superiór sira atu hala’o sira-nia atividade hodi ajusta-an atu buka kompleta rekizitu 10 ne’ebé mak sai nu’udar sasukat ida.

Nia dehan, universidade sira iha kompeténsia tomak atu loke sira-nia atividade kampus regular, eskola polo no klase paralela iha ne’ebé de’it, ne’ebé bainhira la’o ona durante tinan-rua maka Governu foin kria fali planu ka programa avaliasaun ida hodi nomea péritu sira ne’ebé iha koñesimentu kona-ba lei sira ne’e hodi halo avaliasaun ba atividade iha Instituisaun Ensinu Superiór sira.

“Ita la kompreende tanba Governu haruka fali funsionáriu baibain ida mak ba halo avaliasaun la bazeia tan ba rekizitu 10, hafoin mai aprezenta relatóriu ba ita-nia Ministru hodi foti desizaun taka ita-nia atividade,” nia akresenta.

Lisensa operasionál ne’e ninia atribuisaun bainhira atividade kampus regular, klase polu no eskola paralela ida la’o ona foin maka hetan lisensa operasionál, atu nune’e bele buka kompleta rekizitu 10 ne’ebé iha.

“Maibé kuandu atividade iha kampus sira maka la kompleta no la atinje padraun ne’ebé hatuur ona, maka Governu iha kompeténsia tomak deside hapara atividade,” nia tenik.

Antes ne’e, Ministru Ensinu Superior Siénsia no Kultura, Longuinhos dos Santos, foti desizaun hodi hapara atividade klase paralela UNPAZ iha RAEOA tanba klase ne’e la hetan lisensa operasionál hosi ministériu.

Maski nune’e, atividade aprendizajen ba klase paralela UNPAZ iha Oé-cusse kontinua la’o no kontinua hein karta lisensa operasaun hosi MESSK.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!