Grupu empoderamentu ekonomia feto 384 rejistu ona iha SEII
DILI, 13 jullu 2022 (TATOLI)—Diretora Nasionál Dezenvolvimentu Jéneru, Francisca de Sousa, hateten hosi 2019-2022 grupu empoderamentu ekonomia feto 384 hosi munisipiu 12 inklui Rejiaun Administrativa Espesiál Oé-Cusse Ambeno (RAEOA) mak agora rejistu ona iha Sekretária Estadu Igualdade Inkluzaun (SEII).
Notísia Relevante: Programa empoderamentu ekonómia feto implementa iha suku 150
“Iha 2022 ne’e, grupu empoderamentu ekonomia feto iha 125 mak aprova no asina ona akordu entre SEll ho Asosiasaun entaun iha fulan-jullu nia-laran, ita bele transfere ona osan ba iha asosiasaun hodi asosiasaun bele transfere fali ba iha konta grupu sira-nian,” Diretora ne’e hateten ba Agência TATOLI, liuhosi WhatsApp, kuarta ne’e.
Aleinde ne’e, SEll mós ajuda grupu ne’ebé iha ninia membru balun ne’ebé mak ho kondisaun defisiénsia hanesan iha munisípiu Manufahi, Covalima, Liquiça no Viqueque.
Diretora ne’e hateten, atividade sira ba programa empoderamentu ekonómia feto mak hanesan halo negósiu loke kioske, soru tais, alfaiate no agrikultór integradu sira hanesan hakiak fahi, manu, karau, bibi, ikan, kuda modo no prodús bani-been.
Tanba, nia dehan, hosi atividade sira-ne’e bele hasa’e sira-nia rendimentu família, selu oan sira-nia eskola no ema okpuadu ho ativiade hirak ne’e sei bele redús violénsia iha uma laran.
Husu kona-ba grupu ida-ne’ebé mak SEll konsidera hetan susesu ona, nia hatán, SEll seidauk ba hala’o avaliasaun ikus nian iha tinan ida-ne’e hodi determina grupu sira-ne’ebé mak tama kategória susesu, tanba iha tinan rua ikus ne’e Timor-Leste moris iha situasaun pandemia COVID-19.
Iha biban ne’e, grupu benefisiáriu sira barak afetadu no sira-nia negósiu la la’o ho di’ak, grupu sira balun kontinua moris ho osan ne’ebé iha no grupu foun sira-ne’ebé foin simu osan iha tinan 2-21 nia rohan no hahú hala’o negósiu.
Maibé, iha grupu balun hosi ekipa monitorizasaun nota ona katak sira balun la konsege kontinua sira-nia negósiu tanba razaun oioin, maibé razaun fundamentál ida mak situasaun pandemia COVID-19 trava sira halo negósiu ho livre no lakon merkadu.
“Entaun sira-nia produtividade menus no vontade servisu hodi asegura negósiu mós lakon. lha grupu balun ne’ebé hateten katak sira lakon vontade tanba laiha akompañamentu, formasaun no monitorizasaun hosi SEII,” nia dehan.
Hosi grupu ne’e, grupu 14 mak rejistu ona iha SERVE mak kompostu hosi Baucau iha grupu haat (4), Dili iha grupu tolu (3), Manatuto iha grupu tolu (3) no Liquiça iha grupu ida (1), Lautém iha grupu tolu (3) no kada grupu másimu ema na’in-10 no mínimu ema na’in-lima (5).
Nia dehan, iha grupu balun ne’ebé mak seidauk rejistu tanba iha nia dezafiu hanesan membru grupu sira balun nia Billete Identidade (Bl) laiha, hodi difikulta sira labele rejistu iha SERVE.
“Aleinde dezáfiu iha mós opurtunidade ida ba sira tanba iha situasaun pandemia COVID-19 mós fó afeta ba grupu sira hodi hala’o sira-nia negósiu ho di’ak. Iha mós oportunidade tanba grupu balun konsege rejistu ona iha SERVE,” diretora ne’e dehan.
Apoiu orsamentu ba grupu sira hamutuk $2,000 mai kraik no SEll mós fasilita apoiu orsamentu ba asosiasaun ba grupu benefisiáriu ho montante osan ne’ebé la hanesan tanba balun hetan $2,000 to’o $12,000.
“Ho apoiu orsamentu ne’e, ita kontinua haforsa ninia atividade monitorizasaun liuhosi Pontu Fokál sira-ne’ebé destaka ona iha nível postu no munisípiu atu kontinua kontrola no tau-matan ba grupu sira, liu-liu ba grupu sira-nia responsabildiade atu fó fila osan inan,” nia dehan.
Jornalista : Osória Marques
Editór : Cancio Ximenes
