DILI, 13 jullu 2022 (TATOLI)–Governu Timor-Leste liuhosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten, informasaun ne’ebé espalla katak pasaporte Timor-Leste labele tama Portugal ne’e la loos.
“Informasaun ne’e la’ós hosi Governu. Sé sira hakarak bandu timor-oan labele tama, sira sei dehan mai Governu Timor-Leste liuhosi Ministériu Negósiu Estranjeiru no Kooperasaun,” Ministra Adaljiza, informa iha Palásiu Governu, kuarta ne’e.
Notísia relevante: Governu halo esforsu repatria sidadaun na’in-hitu iha Jakarta
Tuir Ministra, Governu la impede kualker viajen uza billete ne’ebé sosa privadu.
“Governu bandu ka ita husu para sira labele simu timor-oan ne’e la loos. Tanba hosi Ministériu Negósiu Estranjeiru no Kooperasaun mak sei iha komunikasaun ho Governu portugés ka nasaun seluk, ne’ebé kuandu sira bandu no ita labele tama, sira sei dehan ba ita ou imi (timor-oan) tama bá iha ne’ebá buat ruma la loos hanesan billete ne’e, billete fila laiha ne’e ema labele husik tama,” nia akresenta.
Governante ne’e dehan, lei Portugal nian la bandu pasaporte Timor-Leste atu tama ba Portugal, eseptu billete falsu ou prazu emisaun liu ona maka sira-nia Servisu Migrasaun la autoriza.
Informasaun ne’ebé espalla iha mídia sosiál katak Migrasaun Portugal nian la simu sidadaun ho pasaporte Timor-Leste tama Portugal, liuliu ho aviaun QATAR, tanba ne’e maka timor-oan barak sei hela iha Jakarta no Denpasar (Indonézia), Singapura, no Malázia, ne’ebé kestaun hirak ne’e mosu tanba dehan Estadu Timor-Leste mak kontaktu ba Governu portugés atu la autoriza pasaporte Timor-Leste tama Portugal.
Jornalista : Antónia Gusmão
Editora : Julia Chatarina
