OJE 2022: SMAS foin ezekuta 14,08% iha trimestre daruak
COVALIMA, 13 jullu 2022 (TATOLI)—Diretór Servisu Munsípál Asaun Sosiál (SMAS), Abrão do Nascimento informa, iha ezekusaun OJE 2022 ne’e SMAS foin ezekuta 14,08% ne’ebé ekivalensia ho osan hamutuk $15,624.34.
Ezekusaun hirak-ne’e ezekuta ba kategória saláriu no vensimentu atinje ona 2,78% ekivalensia ho osan $3,492.00 no ezekuta ba programa semináriu ka workshop kona-ba violénsia doméstika kada trimestre aloka orsamentu $302.85 ne’ebé ezekuta ona $605.70, orsamentu ba konvustivel karreta funeráriu rua no ba motor Verza ida (1) alok $4,310.00 ne’ebé azekuta ona 1,56% ekivalensia ho osan hamutuk $2,161.64.
“OJE 2022 aloka ba servisu munisipál asaun sosiál Covalima hamutuk $138,215.00 ne’e, ami ezekuta foin atinje 14,08% ba programa semináriu, saláriu no vensimentu,” Abrão do Nascimento relata ba Agência Tatoli, iha nia knar fatin, Bairru Costa, tersa ne’e.
Nia informa, programa sensibilizasaun kona-ba violénsia doméstika no trimestre dahuluk realiza iha postu administrativu Zumalai tuir planu sei realiza iha postu administrativu Tilomar.
Funsionáriu sira-ne’ebé iha hala’o knar iha Servisu Munisipál Asaun Sosiál hamutuk na’in-neen (6) ne’ebé kompostu hosi funsionáriu permanente na’in-tolu (3), ajente administrasaun na’in-ida (1) no funsionáriu kazuál na’in-rua (2).
Jornalista : Celestina Teles
Editór : Cancio Ximenes
