PNTL Viqueque rekolla koima infrasaun kódigu estrada $4.919 durante fulan-hitu
VIQUEQUE, 13 jullu 2022 (TATOLI)—Polísia Nasionál Timor Leste (PNTL) munisípiu Viqueque liuhosi unidade Tránzitu, hahú janeiru to’o jullu rekolla koima infrasaun kódigu estrada hamutuk $4.919 ba kofre Estadu.
“Hahú hosi janeiru to’o jullu 2022, Polísia munisípiu konsege rekolla koima hamutuk $.4.919 no daudaun Polísia Tránzitu kontinua halo check point ba rodoviáriu sira iha vila laran, atu ema labele kontra kódigu estrada,” Komadante PNTL munisípiu Viqueque, Supertendente Polísia, Sebestião Alves Quintão, hateten iha Komandu PNTL munisípiu Viqueque, kuarta- ne’e.
Notísia relevante: Prevene asidente, PNTL sensibiliza Kódigu Estrada ba utulizadór dalan públiku
PNTL munisípiu Viqueque implementa tuir dekretu-lei númeru 06/2003 kona-ba rejime tránzitu, hodi kondena ema sira ne’ebé viola kódigu estrada.
“Nune’e, ema hotu tenke kumpre rejime tránzitu, sé maka la kumpre tenke multa, ezemplu ema ida tula ema ida tenke uza kapasete, se la uza kapasete maka tenke tilang,” nia akresenta.
Komadante PNTL munisípiu hamutuk ho unidade Tránzitu kada loron tun terrenu hodi haree movimentu iha munisípiu Viqueque.
“Ha’u rasik maka tun direta hamutuk ho ekipa tránzitu hodi tun ba terrenu hodi haree ema sira ne’ebé viola. Ami mós halo sosializasaun ba motorista sira no ema ne’ebé kontra tenke hetan multa hodi hatama reseita ba kofre Estadu,” nia tenik.
Aleinde ne’e, ema ne’ebé laiha karta kondusaun, tuir lei tenki tama sela tinan-rua ka multa, dokumentu mate ka la moos sei tama kategoria infrasaun, dokumentu karreta loron ida selu multa $2,50 no ema ne’ebé la uza kapasete prosesu sira-ne’e maka daudaun ne’e PNTL aplika iha munisípiu Viqueque.
Ho nune’e, PNTL munisípiu Viqueque husu ba sidadaun sira atu kumpre dekretu-lei tránzitu.
“Ami daudaun implementa bazeia ba dekretu-lei, sé maka kontra sei tama infrasaun kódigu estrada,” nia dehan.
Jornalista : Vitorino Lopes da Costa
Editora : Julia Chatarina
