Top

PR Horta kontente timoroan jere Timor Telecom

Prezidente Repúblika, José Ramos Horta, hala'o vizita ba telekomunikasaun Timor Telecom iha Caicoli, kuarta (13/07). Imajen Tatoli /Egas Cristóvão.

DILI, 13 jullu 2022 (TATOLI)—Prezidente Repúblika (PR), José Ramos Horta, kuarta ne’e, hala’o vizita ba Timor Telecom iha Caikoli, Dili, hodi observa no haree direta operadór telekomunikasaun ne’e ninia atividade ne’ebé eziste hala’o ona tinan barak iha Timor-Leste.

“Ha’u kontente tanba ekipamentu sistema informasaun nian, enerjia elétrika, data baze, ho sira seluk timoroan de’it mak operasionaliza ba funsionamentu operadór ne’e nian loro-loron. Tinan barak ona hau la mai foin vizita fali admiradu di’ak tebe-tebes ho teknlojia ne’ebé iha ne’e no observa 100% timoroan jestaun tékniku di’ak iha buat hotu-hotu iha Timor Telecom. Prabéns ba sira hotu-hotu,” PR Horta hateten ba jornalista sira.

Xefe Estadu dehan, Timor Telecom iha tinan sira-nia laran halo investimentu millaun $200 investe iha Timor-Leste, Estadu Timorense hanesan sósiu halo parte kompañia ho 20%,  ne’eduni Estadu Timor-Leste nia haree depende nia interese no Timor-Leste nia kompañia  iha abilidade rasik.

“Ne’eduni, ha’u vizita setór privadu hotu-hotu timorense ka estranjeiru ne’ebé kria empregu iha rai ne’e ki’ik ka boot, ha’u sempre vizita rona sira-nia problema no sira-nia planu. No, Timor Telecom ohin tama iha ne’e haree timorooan lubuk ida atus ba atus prezente funsionáriu, ne’e mak kontente. Parabéns ba sira hotu-hotu,” nia apresia.

Horta rekuñese problema rede internet sai nafatin preokupasaun kliente sira-nian, maibé hein katak iha tempu oin mai operadór ne’e sei mellora liutan ninia atendimentu.

“Iha limite buat balun ne’ebé Timor Telecom labele rezolve ne’e tanba ita seidauk iha kabu-submarinu buat hotu-hotu liu hosi satélite, no kontratu fali ho Telkomcel bainhira falla. Entaun, Timor Telecom mós impaktu maibé iha tinan rua tan bele iha ona kabu-submarinu mai hosi Darwin, Alor, Atambua, setór telekomunikasaun sei sai sekulu 21 nian,” nia hateten.

Durante sorumutu, PR rona mós preokupasaun ne’ebé hato’o relasiona ho dívida ne’ebé Estadu seidauk selu ba iha Timor Telecom hamutuk millaun $5.

“Dívida Estadu Millaun $5 nian ho Timor Telecom ne’ebé Estadu rasik tinan hirak nia laran la selu. Ministéiru sira halo komunikasaun oioin depois haluha tiha selu entaun loloos ita-nia Estadu labele hanesan ne’e. Purtantu, ida-ne’e la’ós faila Primeiru-Ministru, Taur Matan Ruak, nian maibé mai kedas hosi primeiru Governu. Tan ne’e, Governu presiza haree ida-ne’e,” Ramos Horta hateten

Iha parte seluk, Xefe Estadu husu Governu haree ba investimentu boot operadór telekomunikasaun ne’e nian iha rai-laran ne’ebé fó mós servisu ba timor-oan lubuk, nune’e Estadu presiza fó apoiu ba Timor Telecom iha nia atividade sira.

“Ita-nia rain ki’ik, ema millaun ida resin, iha utilizadór na’in hira. Purtantu, ita loke ba kompañia hotu-hotu mai, balun sei mate. Baibain iha mundu mate ida fraku ne’e, entaun se Estadu iha parseiru ho Timor Telecom  ne’e investimentu estratéjiku kualkér nasaun iha mundu setór telekomunikasaun estratéjiku ne’e kuidadu loos de’it interese komersiál maibé national security,” nia dehan.

Entaun, nia dehan, Estadu tenke haree nia didi’ak  bele fó fasilidade liután menus impostu, despeza iha eletrisidade tanba Timor Telecom gasta osan lubuk ida ho sira-nia jeradór rasik hodi labele falla, konta eletrisidade Timor nian karun tebes entaun se parsialmente kompañia ne’e Estadu nian tenke haree ba ida-ne’e.

Diretór Dirasaun Jurídiku Timor Telecom, Manuel Cárceres, hateten vizita PR nian ba família Timor Telecom sente onradu tebes hodi haree rasik situasaun reál hodi ko’alia direita ho kolaboradór no jestór sira.

Prezidente Repúblika, José Ramos Horta, hala’o vizita ba telekomunikasaun Timor Telecom, iha Caicoli, kuarta (13/07). Imajen Tatoli /Egas Cristóvã,

“Ami halo aprezentasaun ba Prezidente no prezidente hala’o vizita haree ekipamentu informasaun teknójia, ne’ebé impresaun Prezidente Repúblika tinan 15 Timor Telecom liu ba haree ema estranjeiru barak maibé ohin nia mai malae nia lalatak mós laiha, 100% timoroan. Ne’e signifika timoroan prontu ona atu tama ba iha merkadu telekomunikasaun. Ezemplu  konkretu mak Timor Telecom, ohin ami esplika ba PR laiha diretór ida mak malae, hotu-hotu timoroan de’it,” nia dehan.

Enkuantu dadaun ne’e Timor Telecom harii ona tore hamutuk 266 ba 3G no 4G iha 102 iha territóriu nasionál, mezmu nune’e sei iha lamentasaun parte balun laiha rede, nune’e planea sei harii tan tore balun iha área rurál hodi fasilita povu Timor-Leste uza meiu komunikasaun.

Daudaun ne’e Timor Telecom rejista nia kliente hamutuk rihun 700-resin no sira-ne’ebé uza simcard ativu loro-loron iha rihun 45.

Entertantu, Timor Telecom iha funsionáriu permanente hamutuk na’in-397 ho 60%-resin ne’e mane no 33% ne’e feto.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!