BAUCAU, HEADLINE, MUNISÍPIU, SAÚDE

Saúde Baucau rejista kazu dengue 56

Saúde Baucau rejista kazu dengue 56

Diretór Servisu Munisipál Saúde Baucau, Domingos Reinaldo da Costa Guterres. Imajen Tatoli/Natalino Belo.

BAUCAU, 13 jullu 2022 (TATOLI) – Servisu Munisipál Saúde Baucau durante fulan-maiu to’o jullu rejista pasiente moras dengue hamutuk na’in-56.

Diretór Servisu Munisipál Saúde Baucau, Domingos Reinaldo da Costa Guterres, hateten, pasiente hirak-ne’e identifika pozitivu bainhira halo tratamentu kada sentru saúde nune’e kontinua transfere ba Hospitál Rejional Eduardo Ximenes tanba presiza fó atensaun sériu.

Hosi pasiente na’in-56 komposta hosi Baucau vila hanesan suku Bucoli, Bahu, Caibada, Tirilolo no Uailili.

Nune’e mós postu Venilale mak suku Bercoli, Fatulia no Suku Uatuhaco. Hosi parte postu Vemasse iha suku Vemasse Tasi, Quelicai iha suku Maluru.

“Ita ho esforsu hanesan sempre halo promosaun, avizu liuhosi enkontru sira kona-ba kontrola hahalok komunidade nian atu oinsá bele halo prevensaun,” Diretór Saúde Baucau hateten iha Vila Antiga, tersa ne’e.

Saúde Baucau husu ba lideransa suku no komunidade ein-jerál atu kontinua kolabora no hamoos fatin públiku no uma privadu sira tanba kazu dengue hosi susuk ne’ebé moris iha ambiente lamoos, liuliu bainhira klima udan halo bee nalihun iha vazu no tanki  ne’ebé sai fatin larva.

Pesoál saúde sira kontinua tama sai uma sosializa inklui kombate susuk uza maneira abate hanesan rega ai-moruk no maneira seluk mak bainhira identifika pasiente pozitivu dengue, pesoál saúde sei rega ai-moruk iha uma pasiente inklui viziñu uma purvolta distánsia metru 200.

“Di’akliu rega atu evita viziñu sira labele afeita tán,” Domingos akresenta.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!