Abríl to’o juñu, moras ISPA no kulit aas iha Sentru Saúde Becora
DILI, 14 julu 2022 (TATOLI)— Responsavél vizilánsia iha Sentru Saúde Becora, Laura Pereira Neto, informa hahú iha fulan-abríl to’o juñu, moras Infesaun Vias Respiratóriu Aguda ka ISPA no moras kulit rejista aas iha Sentru Saúde Becora, munisípiu Dili.
“Iha fulan tolu ne’e, ami rejista moras ne’ebé aas liu mak hanesan Vias Respiratóriu Aguda (ISPA) hamutuk 5.048, moras kulit 1,092, no diareia 830,” Responsavél ne’e hateten ba Agência TATOLI iha nia knaar fatin Becora, kinta ne’e.
Tuir dadus, iha abríl rejista moras ISPA 1.706, moras kulit 283 no diareia 157. Iha maiu rejista moras ISPA 1.196, kulit 365 no diareia 248. Enkuantu iha juñu ISPA hamutuk 2.146, moras kulit 444 no diareia 425.
Nia dehan moras ISPA, diareia no kulit afeta labarik tinan-lima ba kraik nomós ba ema boot tanba haree ba mudansa klimatika hosi udan ba bai-loron.
“Moras ISPA ho númeru ass tanba daudaun tempu udan no malirin entaun ita nia sistema imunidade tun bele akontese mear, inus been no fani,” Resposavél ne’e adianta.
Atu prevene an hosi moras ne’e, nia husu ba komunidade atu hamoos ambiente ho rutina, uza maskára, fase-liman bebeik, halo ezersísiu rutina, konsumu bee barak no han ai-han nutritivu.
Estoke ai-moruk sufisiente
Entretantu, Responsavel Farmásia no médikamentu iha Sentru Saúde Becora, Anita Carolina Ximenes, informa estoke ai-moruk iha sentru sufisiente hodi fó atendimentu ba pasiente sira.
“Ami nia estoke ai-moruk sufisiente hela ho tipu 162 liuliu ai-moruk regular hanesan paracetamol tablet, sirup, Amoxicillin, ferrous, sulphate, cotrimoxazole, amlodipine, ibuprofen, diclofenac, vitamina c no folic acid,” Responsavél ne’e informa.
Bainhira estoke ai-moruk laiha ka menus, mak halo pedidu ba Servisu Saúde Munisípiu Dili (SSMD) hodi halo distribuisaun medikamentu.
Kona-ba atendimentu pasiente, nia dehan la’o di’ak tanba bainhira halo tratamentu ba pasiente ida mak presiza diagnostika transfere ba Hospitál Nasionál Guido Valadares (HNGV).
Kada loron pasiente ne’ebé halo tratamentu saúde iha sentru ne’e hamutuk 300-resin.
Jornalista : Felicidade Ximenes
Editór : Florencio Miranda Ximenes
