VIQUEQUE, 14 jullu 2022 (TATOLI)–Administradór munisípiu Viqueque, Januário Soares ‘Bolly’ preokupa ho dalan Welolo ne’ebé to’o agora Ministériu Obra Públika (MOP) seidauk rezolve.
“Iha inísiu mota liuhosi parte Luka, maibé agora bee la liu hosi mota Luka tanba mosu segimentasaun, entaun daudaun bee la’o tuir dalan bá Welolo nian. Ha’u hanoin bainhira ita halo intervensaun presiza ekipamentu sufisiente mai iha mota Luka hodi rezolve, tanba ida-ne’e sai hanesan problema ida. Ha’u sei tenta nafatin MOP hodi haree situasaun parte Welolo nian,” Administradór hateten ba Agência Tatoli, iha ninia knar fatin, kinta ne’e.
Notísia relevante: IGE, I.P hahú normaliza dalan Welolo Viqueque
Nune’e, nia husu ba MOP atu koordena mós ho Institutu Jestaun Ekipamentu, Institutu Públiku (IGE, I.P) tanba institutu mobiliza ona ekipamentu iha Welolo maibé serbisu ladun efetivu.
“Dalan ba parte Welolo ne’ebé bee halai tuir dalan, komunidade preokupa hosi tinan kotuk to’o mai agora tanba difikulta movimentu, ha’u koordena ona ho parte MOP atu mai hadi’a maibé to’o agora seidauk rezolve,” nia akresenta.
Autoridade munisípiu Viqueque dehan, dalan Welolo a’at desde akontese dezastre naturál iha tinan 2021.
“Ha’u haree IGE, I.P haruka ekipamentu pezadu hanesan eskavatór ida iha Welolo, maibé ekipamentu ida de’it la sufisiente hodi halo normalizasaun dalan, tanba ita haree volume serbisu boot. Enkuantu, iha Timor-Leste akontese iha fatin barak, nune’e ita maka kompreende, mobiliza ekipamentu ida-ne’e atu responde Welolo, ne’e ha’u sente susar presiza projetu boot hodi normaliza,” nia tenik.
Jornalista : Vitorino Lopes da Costa
Editora : Julia Chatarina
