DILI, 14 jullu 2022 (TATOLI)—Diretór Téknika Administrasaun Eleitorál (STAE), Acilino Manuel Branco, hateten sistema biométriku hanesan kartaun seguru liu no eletróniku ne’ebé sei substitui kartaun eleitorál.
Notísia Relevante: STAE sei resensia eleitorál ho sistema biométriku iha 2022
“Biométriku hanesan kartaun seguru liu no eletróniku, ne’ebé elementu sira iha futuru sei introdús no bele utiliza eletronikamente ba prosesu eleisaun sira tuir mai. Biométriku ne’e sei substitui ba kartaun eletorál ida agora ne’e maibé nia deferensa mak modelu no nia kustu,” Diretór STAE ne’e hateten Agência TATOLI iha nia knaar fatin Caicoli, kinta ne’e.
Daudaun ne’e kartaun eleitorál ne’ebé mak atendimentu ne’e eletrónika, maibé iha elementu seluk seidauk fasilita atu implementa.
“Kuandu aban bainrua iha ona kartaun eleitorál biométriku, bainhira iha eleisaun la presiza uza lista votante maibé leno de’it ba sistema dadus sira,” nia hatutan.
Tanba ne’e, nia dehan, sistema biométriku ne’e di’ak, kontribui no halo dezenvolvimentu ba futuru ne’ebé di’ak liután, tanba Timor-Leste presiza estabelese sistema biométriku ne’ebé di’ak iha futuru, liu-liu ba implementasaun lisensiamentu biométriku hodi garante liután baze dadus no kartaun eleitorál eletróniku ne’ebé seguru.
Resensiamentu eleitorál sira la’o ne’e define tuir lei no regula tuir lei númeru 6/2016.
“Nune’e iha tinan ne’e ita-nia tékniku STAE hahú halo kompras ba ekipamentu biométriku nian no ita sei implementa iha tinan oin depois eleisaun parlamentar,” nia dehan.
“Tanba ita-nia planu pelumenus tinan oin ita bele hatene ona sistema no funsionamentu no mós modelu ne’ebé ita hakarak ona, nune’e bele garante di’ak liután prosesu produsaun sira iha futuru,” nia dehan.
Nia haktuir, sistema biométriku mós bele kontribui ba buat ruma ne’ebé akontese. Ezemplu, votante ida mak vota ona mak tenta vota tan iha fatin seluk entaun sistema ne’e bele identifika automatikamente.
Liga ho rede internet iha Timor-Leste ne’ebé lentu, nia dehan, parte relevante sei halo diskusaun no estudu viabilidade mós la’o hela no Timor-Leste hakarak opta sistema ne’ebé di’ak inklui kontestu ho situasaun ne’ebé iha.
“Produsaun sistema biométriku ne’e kontribui ba dezenvolvimentu maibé ninia desvantajén boot mak sei implika ba kustu ne’ebé prodús kartaun refere. Vantajen mak nu’udar instituisaun Estadu ida oinsá mellora,” nia dehan.
Notísia Relevante: CNE sei introdús sistema biométriku iha Eleisaun Parlamentar 2023
Jornalista : Osória Marques
Editór : Cancio Ximenes
