DILI, 14 jullu 2022 (TATOLI)–Estudante hamutuk 90.000 hosi eskola 446 iha territóriu nasionál sai ona benefisiáriu hosi fundu Estadu Unidu Amerika (EUA) ho montante millaun $26, liuhosi programa edukasaun no nutrisaun ‘Hatutan’ iha Timor-Leste, ne’ebé implementa dezde tinan 2018.
“Iha tinan kotuk, ita aumenta tan programa hodi fó merenda eskolár ba labarik sira hamutuk 79.000 iha Timor-Leste,” Reprezentante Embaixada EUA iha Timor-Leste, Zema Semunegus, informa iha Otél Novo Turismo, Bidau Lecidere, kinta ne’e.
Tuir reprezentante ne’e, intensaun EUA hosi United States Department of Agriculture (USDA) iha Timor-Leste realiza programa ne’e tanba durante tinan hirak ba kotuk, mundu hasoru dezafiu boot ho pandemia COVID-19 inklui Timor-Leste, ne’ebé ninia atividade ensinu aprendizajen paradu.
Nune’e, bazeia ba programa komprovadu ne’e konsidera nu’udar komponente ida hodi hamenus má-nutrisaun ba labarik sira.
“Programa Hatutan no Merenda Eskolár nu’udar susesu boot ne’ebé tenke kontinua lori ba oin tuir programa prioridade Xefe Estadu Timor-Leste, ne’ebé hakarak tau-matan maka’as hodi investe iha saúde, nutrisaun no edukasaun ida ne’ebé di’ak liu. Tanba ne’e EUA liuhosi USDA apresia planu sira atu aumenta investimentu no ajustamentu administrativu sira hodi hadi’a dezempeñu estudante sira iha Timor-Leste,” nia akresenta.
Notísia relevante: Governu prevee orsamentu millaun $8,4 hodi realiza programa merenda eskolár
EUA iha nafatin kommpromisu atu kontinua serbisu hamutuk ho Governu Timor-Leste hodi kontinua asegura programa Hatutan nia meta sira hodi hasa’e númeru matríkula, hamenus hamlaha, hadi’a nutrisaun no hasa’e dezempeñu akadémiku, liuliu ba labarik feto no komunidade kbiit laek sira iha Timor-Leste atu tulun nasaun ne’e bele habelar liu tan ninia prosperidade ekonómika iha nasaun ne’e.
Enkuantu USDA ninia programa edukasaun no nutrisaun Hatutan, iha objetivu atu hadi’a liután literasia ba labarik sira ho idade ho eskola nian no hadi’a prátika saúde nutrisaun no dieta sira, ne’ebé serbisu hamutuk ho eskola 453 hosi tinan 2019 to’o ohin loron.
Rezultadu hosi kooperasaun serbisu hamutuk entre USDA ho Governu Timor-Leste ne’e konsege fahe ona tonelada métriku 3.098 ai-han doadu, tonelada métriku 2.072 foos fortifikadu, tonelada métriku 731 koto Makerek no tonelada métriku 296 mina vejetál fortifíkadu, ho rezultadu apoiu 17.733.401 refeisaun ba alunu na’in-89.987.
USDA mós buka hadi’a abilidade ba pesoál eskola 1.335 ho jestaun merenda eskolár inkluindu hadi’a prátika rai ai-han, te’in ai-han no prátika ijiene ne’ebé di’ak no oinsá prepara relatóriu loron-loron.
Jornalista : Tomé Amado
Editora : Julia Chatarina
