BOBONARO, 14 jullu 2022 (TATOLI) – Ministériu Administrasaun Estatál (MAE), aloka rihun $698-resin ($698.497,97) ba Autoridade Munisípiu Bobonaro hodi implementa Programa Mão de Obra Postu Administrativu (PMOPA) iha tinan 2022.
Sekretáriu Autoridade Munisípiu Bobonaro, João Fátima do Carmo, informa orsamentu ne’e aloka hosi Orsamentu Jerál estadu (OJE) tinan 2022 hodi kapasita komunidade, empodera no hakbiit rekuperasaun ekonomia liuhosi atividade limpeza iha estrada rurál no urbana, hamoos valeta, aterru no taka estrada ku’ak hodi fasilita movimentasaun transporte públiku no atividade ekonomia.
Notísia relevante: Programa mão de obra iha Atabae atinje ona 50%
“Ita hetan alokasaun orsamentu $698,497,97, ne’e liuhosi orsamentu retifikativu ne’ebé iha fulan hirak liubá hetan ona aprovasaun, fó-sai ona iha tranferénsia públika ne’ebé aloka ba munisípiu hotu-hotu inklui Bobonaro atu implementa programa ne’e,” nia informa ba jornalista sira, iha Maliana, kuarta ne’e.
Autoridade ne’e haktuir, montante hirak-ne’e sei aloka ba postu administrativu neen mak hanesan, Atabae, Balibo, Cailaco, Maliana, Bobonaro no Lolotoe hodi halo atividade limpeza jerál kobre totál suku 50, inklui halo akizisaun ba ekipamentu no fasilidade serbisu traballadór sira-nian o aluga karreta rekolla lixu.
Nia hatutan, orsamentu refere sei distribui bazea ba planu no atividade autoridade postu sira aprezenta ba administrasaun munisípiu Bobonaro fazedamente kada loron traballadór sira hetan $5 tuir diploma ministeriál númeru 17/2022.
“Kada postu ida hetan rihun $100, ba implementasaun atividade tinan ida tomak, maibé faze dahuluk sira sei halo pedidu foti uluk 50%, depois konklui tiha mak faze segundu foti tán 50% hodi kompleta 100%,” nia katak.
Daudaun ne’e autoridade munisípiu kooderna ho ekipa Diresaun Jerál Dezenvolvimentu Rurál, Ministériu Administrasaun Estatál (MAE) sosializa matadalan Programa Mão de Obra ba administradór postu, xefe suku no xefe aldeia sira nune’e bainhira implementa atividade iha fulan ne’e lideransa sira bele halo jestaun di’ak ba orsamentu ne’e.
Maibé hafoin ida ne’e, autoridade postu idak-idak halo enkontru ho xefe suku sira atu identifika no halo rekrutamentu ba traballadór sira-ne’ebé iha interese atu serbisu, tuir matadalan programa refere kada suku sei foti ema kuaze na’in-20.
“Ita implementa tuir diploma ministeriál ho nia matdalan rasik, tanba ne’e mak sé de’it mak atu serbisu, presiza prenxe rekizitu ne’ebé sei fó-sai hosi administrsaun postu, agora importante mak ne’e komunidade sira tenke koopera ho autóridade sira ba programa governu nian ne’ebé implementa iha suku,” nia apela.
Xefe suku Ritabou, postu administrativu Maliana, munisípiu Bobonaro, Maximiano dos Santos Araújo, agradese ba politíka VII Governu Konstituisionál tanba iha inisiativa di’ak hodi kontinua implementa programa ne’e kada tinan.
“Ha’u hanoin programa ne’e di’ak tebes tanba fó serbisu ba ita-nia komunidade, liuliu joven sira-ne’ebé oras ne’e halimar hela iha suku no aldeia, nune’e labele buka problema, tanba hadeer mai nia tenke prepara-aan ba halo serbisu, maske osan oituan maibé bele sustenta sira-nia nesesidade,” nia hateten.
Notísia relevante: Implementasaun Programa Mão de Obra atinje 75%
Jornalista : Sérgio da Cruz
Editór : Evaristo Soares Martins
