DILI, 14 jullu 2022 (TATOLI)–Governu liuhosi Ministériu Administrasaun Estatál (MAE), tinan ne’e hetan alokasaun Orsamentu Jerál Estadu (OJE) 2022 hamutuk $8.444.450 hodi realiza programa merenda eskolár ba estudante hamutuk 281.418 iha territóriu tomak.
Diretór Nasionál Finansa MAE, Celestino Marques, hateten, orsamentu merenda eskolár ne’ebé MAE simu hosi OJE 2022 ne’e agora aloka hotu ona ba munisípiu sira hodi halo jestaun ba programa nasionál.
“Ita aloka orsamentu ne’e ba sira atu halo preparasaun hodi realiza programa merenda eskolár ba alunu sira bazeia ba loron efetivu ne’ebé fó sai ona hosi Ministériu Edukasaun Juventude no Desportu,” Diretór Nasionál Finansa MAE informa iha Otél Novo Turismo, Lecidere, kinta ne’e.
Notísia relevante: MEJD hasa’e osan merenda eskolár ba kada estudante
Nia esplika, normalmente loron efetivu ne’e iha 190, hahú hosi janeiru to’o novembru, maibé orsamentu tinan ida-ne’e la to’o atu kobre tanba haree hosi kapasidade orsamentu ho ninia transferénsia ba kada munisípiu sira la hanesan ona, ho razaun hosi problema loron efetivu ne’e rasik.
“Ita haree hosi munisípiu balun implementa de’it loron efetivu menus hosi loron 190, signifika hosi loron 150 to’o 70, tanba ita haree tetu orsamentu ne’ebé simu hosi Ministériu Finansa mai munisípiu sira ne’e tuun maka’as. Tanba ne’e, ita haree munisípiu sira sofre duni orsamentu iha tinan ida-ne’e,” nia tenik.
Tuir Diretór, MF tenke halo dezagrega orsamentu ne’e hodi fahe halo despeza boot ba nesesidade subsídiu xefe suku sira, despeza ba operasionál defeza inklui mós saláriu no vensimentu, tanba ne’e orsamentu ba programa merenda eskolár la to’o.
Maski orsamentu ba programa merenda eskolár tinan ne’e la sufisiente, maibé iha vantajen boot bazeia ba dekretu Governu númeru 13/22, ne’ebé ko’alia kona-ba ezekusaun OJE 2022 nian atu fó dalan, kuandu tinan ida-ne’e maka orsamentu sira la konsege halo gastu hotu mak bele tranzita ba tinan oin.
“Sira-nia osan mak ne’e ona, kuandu la konsege gasta hotu maka tranzita de’it ba tinan oin, ne’ebé la fila ona ba kofre Estadu, entaun sira bele kontinua uza ba tinan 2023 hodi prepara hahán ba labarik sira,” nia tenik.
Nune’e, hahú hosi janeiru to’o fevereiru 2023, eskola sira bele iha disponibilidade kontinua utiliza orsamentu 2022 nian hodi hala’o preparasaun ba programa merenda eskolár ba estudante sira, hafoin Governu hein fali proposta alokasaun orsamentu hosi munisípiu sira.
Jornalista : Tomé Amado
Editora : Julia Chatarina
