Top

PM louva desizaun PN autoriza viajen Xefe Estadu ho unanimidade

Primeiru-Ministru, Taur Matan Ruak, akompaña ho membru Governu sira halo diskusaun ho Deputadu sira kona-ba ‘Estado do País’, iha sala plenária Parlamentu Nasional, kinta (14/07). Imajen Tatoli/António Daciparu

DILI, 14 jullu 2022 (TATOLI)–Primeiru-Ministru (PM), Taur Matan Ruak, louva desizaun membru Parlamentu Nasionál (PN) iha loron tersa (12/07), hodi vota fó autorizasaun ba viajen Xefe Estadu, José Ramos Horta, bá Indonézia ho unanimidade, a-favór 60, kontra 0 no abstensaun 0.

“Ha’u kontente tebes kuandu iha Parlamentu vota ba viajen Prezidente Repúblika nian ho votu a-favór 60, maibé ha’u mós laran moras loos tanba uluk ha’u-nia Prezidente la hetan previleiju ida-ne’e,” PM espresa sentimentu iha reuniaun plenaria estraódinária Parlamentu Nasionál, iha ámbitu debate kona-ba Estadu, kinta ne’e.

Notísia relevante: PN aprova pedidu PR Horta vizita Indonézia ho unanimidade

Vizita Xefe Estadu ne’e tuir pedidu sei hala’o viajen iha loron 18 to’o 24 jullu 2022, tanba hetan konvite hosi Prezidente Repúblika Indonézia, Joko Widodo.

Vizita Estadu ne’e akompaña hosi delegasaun Deputadu sira hosi bankada Parlamentár ida-idak inklui membru Governu balun.

Klarifika sa’e karreta hamutuk ho PR Horta

Primeiru-Ministru (PM), Taur Matan Ruak hamutuk ho Prezidente Repúblika, José Ramos Horta, iha karreta ida bainhira halo viajen ba munisípiu Ermera, sábadu (09/07). Imajen/GPM

Iha biban ne’e, Primeiru-Ministru klarifika kona-ba viajen ba munisípiu Ermera hodi hala’o diálogu komunitáriu iha sábadu (09/07), ne’ebé momentu ne’ebá Xefe Governu iha karreta ida ho PR Horta, maibé maibé fila hosi Ermera bá Dili maka ho ida-idak ninia karreta hodi la’o tutuir malu.

“Kona-ba ha’u sa’e karreta hamutuk ho Prezidente Repúblika, mensajen saida mak ami hakarak fó, ami-nia mensajen, menus konflitu mais kooperasaun, tanba ha’u mós hola parte no ha’u iha esperiénsia durante períodu oituan, ne’ebé ha’u iha previleiju lidera Governu ida-ne’e. Ha’u uluk kuandu hanesan Prezidente Repúblika, krítika governasaun Maun Xanana nian maka’as, ha’u nunka hanoin katak loron ida ha’u sai fali Primeiru-Ministru,” eis Prezidente Repúblika ne’e klarifika hodi responde ba preokupasaun Deputadu sira nian.

Notísia relevante: PM Taur husu komunidade Ermera kolabora ho Governu aselera dezenvolvimentu

Jornalista   : Antónia Gusmão

Editora        : Julia Chatarina

Publisidade

Leave a Reply

Latest Post

error: Content is protected !!