Top

PR kondekora Country Diretor WFP ho Grau Orden Timor-Leste

Reprezentante WFP iha Timor-Leste, Dageng Liu. Imajen TATOLI/Francisco Sony

DILI, 14 jullu 2022 (TATOLI)—Prezidente Repúblika (PR), José Ramos Horta, kondekora Reprezentante Country Diretór Organizasaun Mundiál ba Ai-han (WFP, sigla inglés), Dageng Liu, ho medalla Grau Orden Timor-Leste ne’ebé termina ona ninia misaun iha Timor-Leste durante tinan haat.

Orden Timor-Leste kria hosi dekretu lei númeru 20/2009, 06 maiu, ba prestíjiu no dignidade, demostra rekuñesimentu Timor-Leste ba sidadaun nasionál ho estranjeiru iha atividade profisionál, sosiál ka aktu espontanea erosidade ka altruizmu ne’ebé kontribui signifikativu fó benefísiu ba Timor-Leste ka umanidade, presta servisu alta importansia ba povu Timor-Leste iha setór oioin iha prosesu dezenvolvimentu nasionál.

“Kondekorasaun ne’e tuir ha’u-nia tradisaun rasik nunka haluha ema estranjeiru ne’ebé iha ita-nia rain, nu’dar individual ka reprezentante organizasaun ruma par rekuñese sira-nia dedikasaun serví Nasaun Unida no serví Timor-Leste,” PR Horta hateten iha serimónia kondekorasaun ne’e iha Palásiu Prezidensiál Nicolau Lobato, Bairru Pite, Dili, kinta ne’e.

Kondekorasaun ne’e nu’udar tradisaun Prezidente Repúblika (PR) nian hodi rekuiñese no valoriza kontribuisaun no sakrifísiu ne’ebé Country Diretór ne’e fó ona ba povu no nasaun Timor-Leste.

Country Diretór WFP iha Timor-Leste, Dageng Liu, hateten nia-parte sente kontente no agradese ba Xefe Estadu, José Ramos Horta, ne’ebé fó kondekorasaun ba nia.

“Ha’u agradese tebes no ha’u kontente ba kondekorasaun ne’ebé Prezidente Repúblika hato’o ba ha’u. Maske ha’u sei fila no misaun ramata, sei la haluha povu Timor,” nia dehan,

Diplomata ne’e agradese ba povu Timor-Leste ninia kolaborasaun servisu hamutuk durante misaun tinan haat.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!