OÉ-CUSSE, 14 jullu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretaria Rejionál ba Asuntu Edukasaun Solidariedade Sosiál, prevee $245,813.57 ne’ebé aloka hosi Orsamentu Jerál Estadu (OJE) 2022 nian hodi reabilita Eskola Bázika Filiál (EBF) hitu no konstrusaun foun ba eskola rua iha sub-rejiaun Pássabe, Nítibe, Pante Makasar no Oésilo.
“Iha tinan ne’e ita hadi’a halo reabilitasaun ba Eskola Filiál hitu, konstrusaun rua inklui EBC ida tanba iha 2021 hetan dezastre naturál anin hú estraga tiha, entaun ita hatama iha planu manutensaun ba tinan ne’e, agora rezultadu konkursu, hein de’it atu halo lansamentu primeira pedra, ba EBF ualu no EBC ida,” Sekretária Rejionál ba Asuntu Edukasaun Solidariedade Sosiál, Avelina da Costa, hatete iha Oé-Cusse, kinta ne’e.
Nia informa, ne’ebé hetan dezastre naturál iha 2021, edukasaun pendente hodi hatama iha planu manutensaun ba tinan 2022 ne’e, nune’e iha tinan ne’e hahú faze implementasaun.
“Eskola sira-ne’e pendente iha tinan kotuk tanba ita la konsege halo konstrusaun entaun ita re-programa ba tinan ne’e, ita espera antes udan monu rai eskola sira ne’e kompleta ona konstrusaun ba manutensaun, atu fasilita oan sira hala’o prosesu aprendizajen,” nia katak.
Nune’e eskola hirak-ne’ebé atu halo reabilitasaun mak hanesan, iha sub-rejiaun Pante Makasar, iha suku suku Lalisuk reabilita EBF Roti, ne’ebé ezekuta hosi empreza lokál Nuba Ruing Unispesoál Lda, ho valór kontratu $9,321.45, Reabilita EBF Bimano iha suku Taiboko, ezekuta hosi empreza lokál Neon Bahan Unipesoál Lda, ho valór kontratu $18,643.09.
Purtantu, realibilitasaun ba iha EBF Afoneno, Leobatan iha suku Costa kansela tanba empreza la prenxe kritéria.
Sub-rejiaun Nítibe reabilita EBF Bona, iha suku Usitaku, ne’ebé ezekuta hosi empreza lokál Ta’i-Ana Unipesoál Lda, ho valór kontratu $14,047.03. Nune’e mos reabilita EBF Oénunu iha suku Suni-Ufe, ezekuta hosi empreza lokál Bitimo Unispesoál Lda ho valór kontratu $5,925.56.
Ba fali sub-rejiaun Pássabe, reabilita EBF Aijaofukan iha suku Abani, ne’ebé ezekuta hosi empreza lokál Sufnentimo Unipesoál Lda, ho valór kontratu $26,666.66, no iha sub-rejiaun Oésilo reabilitasaun ba EBF Lil-AS iha suku Usitasa’e, ne’ebé ezekuta hosi empreza lokál Suni Lake Sombai, Unipoál, Lda, ho valór kontratu $30,893.73.
Nune’e mós konstrusaun foun unidade rua mak hanesan, konstrusaun foun ba iha EFB Fatukenfua suku Usitaku sub-rejiaun Nítibe, ezekuta hosi empreza lokál Colo Meob Unipesoál Lda, ho valór kontratu $81,528.94 nomoos konstrusaun foun ba iha EBC Ulas Lama iha suku Taiboko, sub-rejiaun Pante Makasar, ne’ebé ezekuta hosi empreza lokál Huno Bahalaku Unipesoál Lda, ho valór kontratu $58,760.11.
Jornalista : Abílio Elo Nini
Editór : Evaristo Soares Martins
