DILI, 14 jullu 2022 (TATOLI)– Sekretáriu Estadu Juventude no Desportu (SEJD) no Embaixada Kuba iha Timor-Leste, sabádu (16/07), realiza festival desportivu no reabertura zona livre veíkulu, hodi komemora tinan 20 relasaun bilaterál entre nasaun rua no Restaurasaun Independensia Timor-Leste dala-20.
Diretór Nasionál Juventude no Desportu iha SEJD, David Tomas de Deus, hateten atividade sira ne’ebé halo iha festival desportivu mak hanesan, kurida maratona kilometru rua, ho rute hahú hosi Embaixada Kuba ramata iha edifísiu SEJD, kurida bisikleta kilometru 12 hahú hosi Embaixada Kuba to’o iha ponte CPLP mak fila-fali ba iha SEJD.
“Atividade seluk ne’ebé atu realiza tan iha SEJD mak hanesan Voleiból, futsal, xadres no aerobika maratona. Ita hahú atividade ne’e iha tuku 07:30 dader to’o ramata,” Diretór Nasionál ne’e hateten liuhosi konferensia imprensa iha edifísiu SEJD, Lecidere, kinta ne’e.
Nia afirma, prémiu ba manán na’in-sira iha eventu ne’e sei tuir de’it dada sorteiu ho bazea ba tikete ne’ebé sei fahe iha Embaixada Kuba.
Iha fatin hanesan, Enkarregadu Embaixada Cuba iha Timor-Leste, José Ernesto Pires, hateten komemorasaun ne’e hodi hanoin hikas tinan 20 ba kotuk kooperasaun bilaterál entre Timor-Leste ho Kuba.
“Selebrasaun ne’e hodi komemora tinan 20 ba kotuk maun boot Xanana Gusmão ho maun boot sira seluk ba hasoru ho Prezidente Cuba, Fidel Castro hodi ajuda Timor-Leste nia dezenvolvimentu. Iha momentu ne’e, Prezidente Fidel Castro hato’o kompromisu ajuda Timor -Leste iha área saúde, nune’e haruka timoroan sira ba estuda iha Cuba no to’o ohin loron kuaze 1.018 mak bá estuda ona iha Cuba,” Diplomata Kuba ne’e esplika.
Festival desportivu ne’e realiza tanba iha kooperasaun servisu entre SEJD no Embaixada Kuba no Nasaun Unida, Ministériu Saúde, Universidade Nasionál Timor Lorosa’e (UNTL), Polísia Nasionál Timor-Leste (PNTL) no Federasaun desportu sira hotu.
Orsamentu ba atividade ne’e hamutuk $3,000 ne’ebé kontribui hamutuk hosi SEJD, Nasaun Unida iha Timor-Leste no Embaixada Cuba.
Notísia relevante: Kuba kompromete apoia TL iha área edukasaun no desportu
Jornalista: Hortencio Sanchez
Editór : Florencio Miranda Ximenes
