DILI, 14 jullu 2022 (TATOLI)—Servisu Apoiu Sosiedade Sivil no Auditória Sosiál (SASCAS), liuhosi Gabinete Primeiru Ministru (PM), kinta ne’e, selebra akordu ho sosiedade sivíl no grupu sira hamutuk 84 hodi bele hetan subvensaun públiku ba tinan ida-ne’e, hodi hala’o servisu multi setorál iha Timor-Leste.
“Ohin ne’e, serimónia lansamentu akordu subvensaun públiku parseriu entre VIII Governu Konstitusionál ne’ebé tutela ba iha Servisu Apoiu Sosiedade Sivil no Auditória Sosiál Parseriu ho Organizasaun Sosiedade Sívil, Grupu Konvensaun Relijiozu no Organizasaun Rezisténsia sira. Ohin, ita hahú ona selebra akordu ho Sosiedade Sivil ho Grupu sira provolta 84 mak sei hetan subvensaun públiku ba tinan ida-ne’e,” Diretór Ezekutivu Servisu Apoiu Sosiedade Sivil no Auditoria Sosiál (SASCAS, sigla portugés), Edwin Duarte Soares Noronha, hateten ba jornalista sira, iha Palasiu Governu, Dili, kinta ne’e.
Totál subvensaun públiku ba Organizasaun Sosiedade Sívil no Grupu sira hamutuk Millaun $1,7 ne’ebé ba ona tinan fiskál 2022, no iha organizasaun balun mak halo servisu pór anuál katak nia hetan osan iha tinan ne’e maibé nia halo servisu to’o 2023.
Kona-ba orsamentu kada grupu hetan orsamentu, nia dehan, iha balun hetan orsamentu kiik no balun hetan boot, tanba ida-ne’e depende ba sira-nia atividade no programa.
“Kiik liu iha $5000 no boot liu iha millaun $400, ida-ne’e ba Organisaun Sosiedade Sívil ho Grupu sira,” nia dehan.
Ho orsamentu ne’e, Organizasaun Sosiedade Sívil no Grupu sira sei halo atividade multi setorál, hanesan atividade agrikultura, pekuária, hortikultura, saúde no seluk tan.
Tanba ne’e, nia husu ba Sosiedade Sívil no grupu sira-ne’ebé hetan ona fundu bele halo servisu di’ak.
“Balun hetan barak-liu no balun hetan uitoan liu, maibé obrigasaun sira tenke halo mak barak liu duke dukue hetan mak baraj liu,” nia apela.
Jornalista : Nelia Fernandes
Editór : Cancio Ximenes
