VIQUEQUE, 14 jullu 2022 (TATOLI)—Diresaun Servisu Saúde Munisípiu Viqueque rejista kazu Tuberkuloze (TBC) hamutuk na’in-285, hahú tinan 2021 to’o jullu 2022.
“Hosi kazu pozitivu 285, Servisu Saúde Viqueque konsege fó tratamentu ba pasiente Tuberkuloze no tratamentu preventiva ba família pasiente pozitivu Tuberkuloze, nune’e moras ne’e labele hadaet ba família no vizinu sira ne’ebé pasiente hela besik ba,” Diretór Servisu Saúde Munisipál Viqueque, Francisco de Carvalho, informa ba Agência Tatoli, iha ninia knaar fatin, iha postu administrativu Viqueque vila, kinta ne’e.
Notísia relevante: PAFG husu Autoridade Viqueque kolabora ho saúde prevene tuberkuloze
Nia dehan, munisípiu Viqueque foin lalais deklara ona atu hapara moras Tuberkuloze, maibé moras ne’e sai hanesan problema saúde públika iha munisípiu Viqueque.
“Ho ida-ne’e ami husu autoridade hotu no komunidade presiza kolabora hamutuk saúde hodi ita bele hapara moras Tuberkuloze iha munisípiu Viqueque,” nia apela.
Biban ne’e nia husu ba komunidade ne’ebé sente iha sintoma moras ne’e, tenki ba fasilidade saúde hodi bele hetan tratamentu.
Antes ne’e, Administradór munisípiu Viqueque, Januário Soares ‘Bolly’, hateten, autoridade lokál sira tenki serbisu hamutuk ho parte saúde hodi indika komunidade ne’ebé hetan asesu ba fasilidade saúde.
“Nune’e ita-nia dekarasaun kombate moras Tuberkoloze iha munisípiu Viqueque to’o tinan 2024 ne’e bele akontese. Atu atinje ita-nia promesa hapara moras ne’e, ita tenki serbisu hamutuk, tantu autoridade lokál no profisionál saúde sira hodi sai ekipa forte atu kombate moras daet ne’e,” nia tenik.
Aleinde ne’e, foin lalais munisípiu Viqueque forma ekipa task force ne’ebé sei luta maka’as kombate Tuberkoloze, nune’e bele atinje meta.
Jornalista : Vitorino Lopes da Costa
Editora : Julia Chatarina
