EKONOMIA, HEADLINE, INTERNASIONÁL

Timor-Leste sei selebra akordu ho MCC implementa programa redús kiak

Timor-Leste sei selebra akordu ho MCC implementa programa redús kiak

Logotipu MCC. Imajen/Espesiál

DILI, 14 jullu 2022 (TATOLI)–Governu Timor-Leste no ajénsia governamentál amerikana Millennium Challenge Corporation (MCC), iha loron 19 jullu 2022 sei asina akordu kooperasaun hodi apoia orsamentu ho montante millaun $484.

“Programa ida sei implementa durante tinan-lima ho, objetivu atu redús kiak liuhosi kreximentu ekonómiku,” refere nota imprensa ne’ebé Agência Tatoli asesu, kinta ne’e.

Asinatura akordu ne’e Timor-Leste sei reprezenta hosi Ministru Prezidénsia Konsellu, Fidelis Manuel Leite Magalhães, no MCC asina hosi Vise-Prezidente MCC, Cameron Alford, ne’ebé eventu ne’e sei realiza iha salaun Ministériu Negósiu Estranjeiru no Kooperasaun (MNEK).

Notísia relevante: Ministru Fidelis aprezenta prosesu negosiasaun-futuru implementasaun MCC ba PR

Investimentu ne’e sei haree ba projetu prinsipál hanesan hadi’a sistema bee, saneamentu, drenajen no ida seluk iha área edukasaun no formasaun.

“Ida uluk inklui tratamentu ba bee, ezgotu, sistema drenajen, reforsu ba instituisaun no entidade reguladór sira, inklui kriasaun abastesimentu sólidu ida ba bee no ezgotu ba uzu doméstiku. Enkuantu seluk mak sei inklui Sentru Exelénsia Foun ida ba formasaun profesór foun sira ne’ebé sei garante padraun kualidade no lideransa nian,” nota ne’e esplika.

Hosi totál ne’ebé kalkula ona hamutuk millaun $484, hosi totál ne’e millaun $420 disponibiliza husi MCC, no Governu Timor-Leste kontribui ho millaun $64.  Nune’e, valór ne’ebé disponibiliza hosi Timor-Leste sei aloka de’it ba projetu tratamentu bee, ezgotu no drenajen nian, hosi osan sira-ne’e millaun $34 sei uza hodi halo ligasaun ba uma sira no hodi dezativa fosa ne’ebé iha, restante millaun $30 sei utiliza hodi apoia instalasaun sistema konvensionál no ba instalasaun bomba bee nian.

Entretantu, Konsellu Administrasaun MCC nian iha dezembru 2017, hili ona Timor-Leste, nu’udár nasaun ne’ebé kumpre rekizitu hodi implementa programa ida ne’e ba promosaun kreximentu ekonómiku, ne’ebé aliña ho prioridade sira dezenvolvimentu nasionál nian.

Iha loron 21 jullu 2018, Ministru Fidelis no Vise-Prezidente Adjuntu MCC nian, Jonathan Brooks, asina ona akordu finansiamentu inisiál ida, ho valór $750.000 hodi kria ekipa ida, ne’ebé integra iha programa MCC, ho misaun atu identifika setór ekonómiku sira ne’ebé sei dezenvolve durante implementasaun programa ne’e nian.

Ekipa Dezenvolvimentu Kompaktu ba Dezenvolvimentu Governu Timor-Leste (CDT-TL) nian ida-ne’e, ofisiálmente kria ona iha loron 25 marsu 2019 no lidera hosi Embaixadór, Constâncio Pinto.

Hosi loron 11 to’o 17 abríl 2022, Ministru Fidelis lidera delegasaun altu nível ida, ne’ebé kompostu hosi reprezentante 14 hosi entidade governamentál oioin, halo viajen ba Estadu Unidu Amérika (EUA), hodi halo negosiasaun akordu kompaktu ho MCC.

Jornalista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!