Abríl to’o juñu, ema na’in-66 mate iha sala emerjénsia HNGV

DILI,15 jullu 2022 (TATOLI)— Hahú hosi fulan-abríl to’o juñu tinan ne’e, Hospitál Nasionál Guido Valadares (HNGV), rejista ema na’in-66 mak mate iha sala emerjénsia.

Xefe Departamentu Kontrolu Kualidade Saude no Komunikasaun Sosiál, HNGV, Sara Maria Xavier hateten pasiente sira ne’ebé mate iha sala emerjénsia tanba sofre kardiovaskular, hipertensaun no asidente tráfegu.

“Pasiente ne’ebé mate iha dalan, hafoin to’o iha sala emerjénsia HNGV na’in-25 no pasiente ne’ebé mate iha sala emerjénsia na’in-41,” Xefe Departamentu ne’e hateten ba jornalista sira iha HNGV-Bidaun, sesta ne’e.

Alende ne’e, Banku Urjénsia mós rejista pasiente ne’ebé hala’o triajen hamutuk 13.672, hosi númeru na’in-599 mak hetan asidente tráfegu.

Pasiente ne’ebé hetan violénsia doméstika hamutuk 36, violénsia fíziku sosiál na’in-52 no pasiente ne’ebé tenta oho-an liuhosi meiu hemu venenu hamutu na’in-lima.

Daudaun, pasiente sira ne’ebé baixa iha sala maternidade hamutuk 1.559, medisina interna 941, sirurjia 430, pediátria 807, perinatolojia 260, pesikateria na’in haat, ICU na’in-51 no  VIP na’in-246.

Enkuantu, pasiente sira ne’ebé mak observa saúde iha sala emerjésia no alta hetan autorizasaun hosi médiku hamutuk 7.491 no pasiente  ne’ebé husu alta na’in-49.

HNGV mós rejista kazu dengue ne’ebé baixa iha pediatria hamutuk 777, medisina interna 134 no pasiente pozitivu COVID-19 na’in-haat.

Bebé na’in-1.400 moris iha HNGV

Entretantu, Sara Maria Xavier informa, durante abríl to’o juñu, bebé na’in-1.400 mak moris, hosi numeru na’in-21 mak mate.

“Inan-isin rua ne’ebé partus iha HNGV hamutuk 1.400, hosi númeru  ne’e inan ne’ebé mak partus normál hamutuk 949 no inan  ne’ebé  mak partu ho komplikasaun  na’in-neen, eklampsia na’in rua, sesariana 252 no abortu na’in-151inklui bebé ne’ebé mate iha inan nia kanotak na’in-21” nia informa.

Bebé ne’ebé mate tanba moris menus hosi loron hitu na’in-38 no bebé ne’ebé mak moris ho pezu ki’ik  na’in-ulau.

Iha fulan jullu, HNGV mós rejistu bebé moris hamutuk 1.416, hosi númeru ne’e bebé ho partu normál 466 no bebé moris ho loron seidauk too na’in-neen no bebé ne’ebé mak moris ho inan sesariana 291.

HNGV aplika regra hein pasiente

Sara Maria afirma tan HNGV mós aplika ona regra autorizasaun  ba  família   pasiente  atu tara kartaun bainhira hein ema moras.

“Família pasiente na’in-ida mak hein ema moras, maibé tenke tara kartaun ne’ebé HNGV fó hodi labele difikulta atendimentu médiku hosi profisionál saúde,” nia afirma.

Regra ne’e ho objetivu atu garante pasiente sira bele deskansa di’ak hodi rekupera lalais no prevene infesaun ka kontajia moras risku sira ba pasiente ka família pasiente sira.

Nune’e, nia husu ba família pasiente hotu kumpre regra liuliu tara kartaun  bainhira hakarak bá vizita ema moras.

“Ha’u husu ba família sira labele lori hahan husi li’ur tanba HNGV mós prepara hahán tuir dieta ka bazeia ba pasiente sira nia moras,” nia afirma.

Entretantu, tuir observasaun husi jornalista Agência TATOLI iha Hospitál Nasionál Guido Valadares katak família pasiente ne’ebé hein ema moras hahú tara ona kartaun ne’ebé fasilita husi pesoál HNGV.

Jornalista : Felicidade Ximenes

Editór      : Florencio Miranda Ximenes