Top

AMD koordena ho PNTL dada sai karreta aat paradu iha estrada públiku

Prezidente Autoridade Minisípiu Dili, Guilhermina Filomena Saldanha. Imajen/Espesiál

DILI, 15 jullu 2022 (TATOLI)—Autoridade Munisípiu Dili (AMD) koordena ona ho Polisia Nasional Timor-Leste (PNTL), oinsá atu dada sai karreta aat ne’ebé durante ne’e paradu iha estrada públiku iha kapitál Díli.

“Ami koordena ona hamutuk ho Komandante Tranzitu Munisípiu Díli, sira sei servisu hamutuk ho DNTT atu oinsá identifika atu dada sai. Koordenasaun servisu kona-ba dada kareta aat sira mak ami iha ona koordenasaun ho Tranzitu Munisípiu Dili, sira mós sei hakbesik fila-fali ba DNTT atu oinsá halo servisu ba ida-ne’e,” Prezidente Autoridade Munisipiu (PAM) Dili, Guilhermina Filomena Saldanha Ribeiro, hateten ba Agência Tatoli, bainhira partisipa iha serimónia aniversáriu Komisaun Funsaun Públiku (KFP), iha Ministériu Finansa Aitarak Laran, Dili, sesta ne’e.

Munisípiu Dili nia kontrolu ba karreta aat ne’ebé paradu iha estrada públiku, hanesan haree no informa ba Tranzitu Munisípiu Dili, depois koordena ho DNTT sira mak ba dada sai.

“Ami-nian nee liuhosi xefe suku no xefe aldeia ida-ida haree no identifika hato’o mai ami karreta ne’e para iha área ne’ebé. Dala barak sira hasai mós ho foto, ami haruka ba iha Tranzitu Munisípiu Dili no sira hamutuk ho DNTT ba iha ne’ebá lori identifika atu bele foti. Tanba, sira iha planu ona servisu hamutuk no ami koopera ho sira para fó dadus,” nia dehan.

Iha futuru mak karreta aat sira-ne’e kontinua paradu iha estrada públiku kapitál Dili, ida-ne’e responsabilidade Tranzitu Munisípiu Dili ho Diresaun Nasionál Transporte no Terrestre (DNTT) atu dada.

“Atu foti karreta aat sira atu ba tau iha fatin ne’ebé, ida-ne’e sira mak hatene. Tanba, DNTT ne’e servisu hamutuk ho Patrimóniu saida mak sira atu halo, sira mak hatene,” nia hateten.

Entretantu, tuir informasaun kaereta aat sira-ne’ebé durante paradu iha estrada públiku iha área kapitál Dili mak iha área Kampu Demokrásia nia oin, Blok 3 Audian, área merkadu Taibesi loja mini nia oin, área edifisiu SDV Bairo dos Grilos, área Quintál Boot besik semitériu santa crúz, área kintál boot dalan tun ba Foho Osan Mean no balun paradu iha Sekretáriu Estadu Juventude no Desportu (SEJD) nia kotuk.

Jornalista : Nelia Fernandes

Editór       : Cancio Ximenes

Publisidade

Leave a Reply

Latest Post

error: Content is protected !!