iklan

EDUKASAUN, HEADLINE, MUNISÍPIU, OÉ-CUSSE (RAEOA)

CI atribui karteira profisionál ba jornalista na’in-hitu iha RAEOA

CI atribui karteira profisionál ba jornalista na’in-hitu iha RAEOA

CI atribui karteira profisionál ba jornalista na'in-hitu iha Oé-Cusse inklui Korrespondente Agência TATOLI, Abílio Elo Nini. Imajen mídia ZEESM.

OÉ-CUSSE, 15 jullu 2022 (TATOLI) – Konsellu Imprensa (CI, sigla portugés), akompaña hosi Prezidente Autoridade RAEOA, Arsénio Paixão Bano, sesta ne’e atribui karteira profisionál ba jornalista na’in-hitu ne’ebé hala’o servisu jornalizmu iha Rejiaun Administrativa Espesiál Oé-Cusse Ambeno (RAEOA).

Konsellu Imprensa atribui karteira profisionál na’in-hitu ne’e mai hosi mídia, Rádiu Komunidade Atoni Lifau hamutuk na’in-lima mak hanesan, Jornalista José Francisco Efi, José Maria Feno, João Caunan, Roger de Fátima, Lamberto Fuamuni.

Nune’e mos Jornalista hosi Agência Noticioza Timor-Leste, Abílio Elo Nini, no renova Jornalista Rádiu Televizaun Timor-Leste, Paulino Marques.

Prezidente Konsellu Imprensa Timor-Leste, Virgílio Guterres, esplika, Konsellu Imprensa nu’udar órgaun ida-ne’ebé mak lei fó kompeténsia atu atribui karteira profisionál ba jornalista sira.

Nune’e, prezensa KI iha RAEOA atu atribui ba kolega jornalista sira-ne’ebé hala’o serbisu jornalizmu liu tinan lima, molok lei komunikasaun sosiál vigora, nomoos hirak-ne’ebé iha períodu estájiu, tanba lei komunikasaun sosiál rekoñese estatutu rua ba jornalista estajiadu no jornalista profisionál.

“Karteira profisionál ne’e hanesan identidade ida atu hatudu, maibé ita-nia profisonalizmu ne’e ita hatudu liuhosi hahalok loron-loron ninian, dalaruma ita, sira-ne’ebé kleur ona komunidade sira dehan la persiza iha kartaun ka lae, maibé sira hatene de’it ita-nia serbisu, entaun serbisu ne’e maka hatudu ita-nia profisionalizmu la’ós kartaun ne’e,” Vírgilio Guteres, ko’alia iha Oé-Cusse, sesta ne’e.

Nia apela ba mídia sira-ne’ebé destaka iha Oé-Cusse, hanesan Rádiu Komunidade Atoni Lifau (RCAL), Rádiu Televizaun Timor-Leste, Empreza Públika (RTTL, EP), Agência Notisioza Timor-Leste, Institutu Públiku (TATOLI, IP) no mídia seluk atu kontinua divulga informasaun ba dezenvolvimentu Oé-Cusse ba nasionál no internasionál.

“Presiza apoia informasaun ba rai boot no komunidade RAEOA, kona-bá dezenvolvimentu progresu saida de’it maka akontese iha-ne’e, tanba RAEOA hetan estatutu espesiál, tán ne’e iha kontestu alokasaun Orsamentu Jerál Estadu nian mós, RAEOA iha korresaun boot tebes,” nia afirma.

Tán ne’e, mídia tenke iha kobertura ida-ne’ebé maka’as atu fó hatene sai ba sidadaun-sira iha munisípiu seluk inklui komunidade RAEOA, katak orsamentu ne’ebé Estadu aloka mai RAEOA ne’e halo duni dezenvolvimentu, no fó duni impaktu ba komunidade.

Tuir nia, iha RAEOA durante ne’e akontese problema barak, problema rai no seluk-tán, entaun importante maka jornalista-sira fó hanoin nafatin dehan, oinsá kompromisu autoridade sira iha RAEOA ne’e atu respeita sidadaun sira-nia direitu ba rai.

“Maibé importante maka RAEOA ne’e sai espesiál ne’e papél importante mídia sira, se lae ema la hatene, ema hatene espesiál ne’e tanba jere nia orsamentu rasik, no nia orsamentu mós ketak no bootliu ho munisípiu seluk, nune’e, molok munisípiu seluk ko’alia kona-bá desentralizasaun, Oé-Cusse nia podér iha ona atu hola desizaun, entaun ha’u hanoin ida-ne’e maka objetivu hosi vizita Konsellu Imprensa nian mai iha RAEOA,” nia katak.

Bazea lei númeru 5/2014, 19 novembru, kona-bá Lei Komunikasaun Sosiál prevista iha artigu 13 kona-bá Hala’o kna’ar jornalista sita pontu lima mak hanesan;

Dahuluk, nu’udar kondisaun hodi hala’o kna’ar jornalista, maka iha abilitasaun ho títulu rasik, hanaran karteira profisionál, ne’ebé Konsellu Imprensa halo no sei hafoun.

Daruak, Governu aprova liuhosi dekretu-ei regulamentu karteira profisionál jornalista no jornalista estajiáriu sira-nian. Datoluk, to’o ba aprovasaun regulamentu ne’ebé temi iha númeru liubá, Konsellu Imprensa halo dokumentu provizóriu ida.

Nune’e mís iha pontu haat, sei rekoñese títulu profisionál sira jornalista nian ne’ebé halo tiha ona hosi rain estranjeiru no ninia portadór sira bele husu inskrisaun no emisaun títulu hosi Konsellu Imprensa, hodi dispensa estájiu profisionál.

Nune’e mós iha pontu ikus, laiha órgaun komunikasaun sosiál ida bele admite ka mantein ninia servisu nu’udar jornalista, sé maka la abilitadu ho títulu ne’e rasik.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!