Covalima selebra loron nasionál Funsaun Públiku ho marsa saudavél
COVALIMA, 15 jullu 2022 (TATOLI)—Autoridade Munisípiu Covalima hamutuk ho funsionáriu no estudante sira komemora loron nasionál Funsaun Públika ho atividade realiza marsa saudavél.
Marsa saudavel ne’e la’o-ain hahú konsentra iha resintu administrasaun munisípiu Covalima to’o iha kampu futeból Ladi, suku Camanasa.
Notísia Relevante: Loron Funsaun Públika: Pároku Suai husu funsionáriu públiku servi povu-nasaun
“Ohin, ita komemora loron nasionál Funsaun Públika ba daualuk, foin komemora loron ida-ne’e ba dahuluk iha munisípiu tanba kada tinan sempre realiza iha nasionál,” Administradór munisípiu Covalima, Francisco de Andrade, hateten ba jornalista sira iha kampu futeból Ladi, sesta ne’e.
Komemorasaun loron nasionál; Funsaun Públika ne’e hala’o bazea ba rezultadu enkontru iha sábadu (15 maiu 2022) liubá iha nasionál, ho nune’e ohin realiza atividade marsa saudavél no mós atividade sira seluk tan.
Autoridade mós promete ba futuru komemora loron nasionál refere sei organiza funsionáriu atu bele partisipa masímu, tanba ema-ne’ebé servi Estadu obrigatóriu tenke komemora loron refere.
Reprezentante Funsionáriu Públiku, Quintino Amarál, sente kontente tanba tinan ne’e bele komemora loron nasionál Funsaun Públiku iha munisípiu Covalima, hodi realiza atividade marsa saudavél no mós atividade sira seluk tan.
“Ami sente kontente bainhira tinan ne’e komisaun funsaun públiku komemora loron nasionál funsaun públika iha munisípiu Covalima foin dahuluk selebra iha munisipiu Covalima,” nia dehan.
Hafoin autoridade Covalima hamutuk ho funsionáriu no estudante sira realiza atividade marsa saudavél to’o iha kampu futeból Ladi, kontinua realiza atividade sira hanesan, estudante hosi Eskola sekundáriu Públiku Suai reprezenta postu administrativu hitu (7) hodi aprezenta traze, bidu hena mutin no muzika.
Tuir observasaun Agencia Tatoli nota katak, durante selebra Loron Nasionál Funsaun Públika hodi realiza atividade ne’e la’o ho hakmatek, tanba Polisia Nasionál Timor-Leste Covalima fó seguransa másímu.
Antes ne’e, iha kinta (14/7) dader, funsionáriu sira iha Covalima hala’o limpeza jerál iha fatin públiku no iha resintu igreja Ave Maria Suai no iha parte lorokraik husu misa agradesimentu hodi selebra loron nasionál Funsaun Públika ne’e.
Notísia Relevante: Loron Nasionál Funsaun Públiku, funsionáriu públiku Covalima hala’o limpeza jerál
Jornalista : Celestina Teles
Editór : Cancio Ximenes
