DILI, 15 jullu 2022 (TATOLI)—Bee Timor-Leste, Empreza Públika (BTL, E.P) hamutuk ho empreza GT internasionál Taiwan, sesta ne’e, selebra akordu ba jestaun rekursu bee-moos iha Timor-Leste.
Akordu ne’e asina hosi Prezidente Konsellu Administrasaun BTL, E.P, Carlos Peloi dos Reis no Reprezentante GT Internationál hosi Taiwan, Sheng Tien, ne’ebé asiste direta hosi Ministru Obra Públika, Abel Pires da Silva.
Biban ne’e, Ministru Obra Públika, apresia akordu kooperasaun ne’e hodi parte rua fahe esperiénsia ba malu.
“Agradese ba kooperasaun ne’ebé parte rua realiza ona hodi fahe esperiensia ba malu, hodi kapasita rekursu umanu iha BTL, E.P no kapasitasaun instituasionál atubele halo serbisu ho di’ak, liu-liu kona-ba fornesimentu bee-moos, hein katak bele implementa akordu kooperasaun ho di’ak,” Ministru hateten hafoin serimónia asina akordu iha salaun enkontru Ministériu Obra Públika (MOP), Caicoli.
Notísia relevante: BTL mellora sistema abastesimentu bee no saneamentu hodi rekolla reseita
Nune’e mós, Prezidente Konsellu Administrasaun BTL, E.P, Carlos Peloi dos Reis, konsidera akordu ne’e hanesan faze dahuluk hodi fó espasu ba GT Internationál hodi apoia BTL, E.P, liu-liu haree kona-ba halo jestaun rekursu ídriku iha Timor-Leste, hanesan konstrui kaptasaun ou retensaun hodi prezerva bee bainhira iha tempu udan.
“Ita asina Memorandum of Understanding ho GT Internationál hosi Taiwan ho intensaun loke dalan atu sira bele fó apoiu ita ein termu halo jestaun ba ita-nia rekursu bee. Ita observa katak, ita-nia nasaun ne’e iha foho mak barak, kuandu iha tempu udan, iha bee barak dala-ruma bee sulin hotu ba tasi, dalaruma mós ita iha difikuldade ein termu asegura fornesimentu bee ba komunidade, bainhira tama iha tempu bailoron, entaun ita presiza maluk sira ne’ebé iha matenek tanba iha sira-nia rai, Taiwan nia kondisaun jeográfika hanesan ita-nia rai Timor no kada tinan sira hasoru tufaun, maibé inundasaun ladún grave hanesan ita-nia,” nia akresenta.
Iha sorin seluk, nia agradese ba GT Internationál hosi Taiwan ne’ebé iha interese no kompromisu hakarak apoia Timor-Leste kona-ba halo estudu ba fatin ne’ebé adekuadu ba retensaun ou prezervasaun bee.
“Ha’u ko’alia ona ho sira, katak sira iha interese hodi halo estudu hafoin mak fó hanoin ba ita, tanba sira iha esperiénsia halo dam iha sira-nia rai, entaun sira sei halo estudu ho sira-nia fundu rasik, ne’e di’ak tanba ita la hasai osan, ema mai halo estudu hafoin fó sujestaun ba ita, hafoin mak ita haree ba oin, tanba ne’e ita agradese tanba sira iha kompromisu hodi halo estudu ba fatin ne’ebé adekuadu atu ita bele halo dam, hafoin sira rekomenda ba ita mak ita hanoin detalla ba oin ne’e atu halo oinsá,” nia tenik.
Nune’e mós, Reprezentante GT Internationál, Sheng Tien, hateten, akordu ne’e hodi realiza kooperasaun serbisu di’ak liután hodi hala’o serbisu kona-ba prezervasaun ou retensaun bee iha Timor-Leste.
“Foin asina akordu, hafoin maka haree prosesu sira ba oin, maibé sei serbisu hamutuk di’ak liután ho BTL.EP hodi apoiu iha atividade sira iha área konservasaun no prezervasaun bee,” nia dehan.
Jornalista : Antónia Gusmão
Editora : Julia Chatarina
