iklan

NASIONÁL, HEADLINE, POLÍTIKA

KFP rejista funsionáriu Públiku na’in-845 uza direitu reforma

KFP rejista funsionáriu Públiku na’in-845 uza direitu reforma

Prezidente Komisaun Funsaun Públika (KFP), Faustino Cardoso Gomes. Imajen Tatoli/Francisco Sony.

DILI, 15 jullu 2022 (TATOLI)–Komisaun Funsaun Públika (KFP) rejista funsionáriu públiku hamutuk na’in-845 mak uza direitu reforma.

“Hosi tinan 2012 to’o agora, tinan-10 ona foin maka na’in-845, hosi ne’e 99% sira ho idade 60 ba leten, ne’ebé mak ho inisiativa rasik hato’o rekerimentu, aprezentasaun no hetan aprovasaun hosi Komisaun Funsaun Públika, no mós hetan atensaun liuhosi Institutu Nasionál Seguransa Sosiál (INSS),” Prezidente KFP, Faustino Cardoso, hateten, iha ámbitu selebrasaun aniversáriu KFP ba da-VIII, iha salaun Ministériu Finansa, Aitarak-laran.

Notísia relevante: KFP atualiza situasaun funsaun públika ba Xefe Estadu

Daudaun ne’e, funsionáriu públiku ativu hamutuk na’in-3.465 mak ho idade tinan-60 ba leten, ne’e konstitui kuaze 10% hosi totál forsa traballu iha KFP.

“Situasaun ida-ne’e sai delikada tebes, bainhira ita liga ho ministériu sira, ne’ebé maioria sira ho idade ne’e. Ita presiza atu haree ho didi’ak, karik idade reforma ita hatuur, presiza iha planu ida di’ak, atu nune’e labele hamosu vakatura, ba profesór sira ne’ebé maka sei foti urjénsia aprendijazen, bele fó risku ba joven sira ne’ebé mak eskola hela,” nia akresenta.

Biban ne’e, Prezidente KFP ne’e hato’o parabéns ba sira-nia kontribuisaun, enkuantu sei ativu iha funsaun publika.

“Aproveita kongratula funsionáriu públiku hirak ne’ebé ho inisiativa rasik deside atu tama reforma, hodi goja sira-nia restu vida hamutuk ho família,” nia tenik.

Maski seidauk iha lei reforma obrigatória, maibé sira ho inisiativa rasik la obriga-an, maski serbisu nafatin ho idade tinan-60 ba leten ona.

Aleinde ne’e, Faustinho Cardoso kongratula no agradese ba INSS, ba serbisu hamutuk institusaun rua hanesan KFP hamutuk no INSS atu viabiliza prosesu sira ligadu ho rekerimentu ba aprezentasaun inisiativa individuál sira.

Konsellu Ministru, foin lalais aprova projetu lei ba autorizasaun lejizlativa kona-ba determinasaun limite idade ba relasaun serbisu funsionáriu públiku no ajente administrativu sira.

Jornalista  : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!