BOBONARO, HEADLINE, MUNISÍPIU, POLÍTIKA

MPO konsulta planu munisipál ordenamentu territoriál iha Bobonaro

MPO konsulta planu munisipál ordenamentu territoriál iha Bobonaro

Ministru Planu no Ordenamentu (MPO), José Maria dos Reis, halo konsulta públiku kona-ba planu munisipál ordenamentu territoruál iha munisípiu Bobonaro. Imajen Tatoli/Sérgio da Cruz.

BOBONARO, 15 jullu 2022 (TATOLI) – Ministru Planu no Ordenamentu (MPO), José Maria dos Reis, sesta ne’e ofisialmente lansa konsulta públiku kona-ba planu munisipál ordenamentu territoriál iha munisípiu Bobonaro.

Iha intervensaun, Vise Primeiru Ministru, Ministru Planu no Ordenamentu, José Maria dos Reis, esplika atividade ne’e  atu rona reprezentante povu sira hotu  nia opiniaun, tanba iha tinan 20 ba kotuk, povu hotu partisipa iha prosesu rezisténsia atu hetan libertasaun ba ita-nia rai, tanba sá prosesu ida atu liberta povu la lori povu atu partisipa iha prosesu ne’e.

Iha fulan kotuk ekipa hosi Diresaun Nasionál Ordenamentu Espesiál sosializa lei baze ordenamentu no halo pre-konsultasaun ba prosesu levantamentu ordenamentu munisipál iha munisípiu no postu administrativu sira.

Notísia relevante: MPO sosializa ordenamentu territóriu ba diretór liña ministeriál iha Viqueque

“Ho hanoin ida-ne’e maka Ministériu Planu Ordenamentu Territóriu, bainhira atu lansa instrumentu sira-ne’e, ami tún mai atubele rona mós povu, tanba bainhira ita ko’alia kona-bá ordenamentu territóriu ema mak hela iha laran, entaun ita husu ema sira-nia opiniaun tanba sira mak hela iha espasu nia laran, atu ita bele halo buat ida di’ak ba populasaun,” nia tenik.

Ezekutvu ne’e apela ba autoridade no entidade relevante sira iha munisípiu Bobonaro atu koopera ho ekipa konsellu konsultivu nasionál no munisipiu atubele elabora instrumentu ne’e ho di’ak, nune’e bele aselera dezenvolvimentu sósiu-ekonómiku iha munisípiu ne’e.

“Sira sei serbisu tinan ida ho balu, depois janeiru fevreiru 2023 foin hotu, konserteza sei lori ba Konsellu Ministru atu aprova hanesan lei ida, nune’e Ministériu Planu no Ordenamentu atubele prodú mapa hodi husik governu ida mai karik bele fó kontinuidade,” nia fó hanoin.

Prezidente Konsellu Konsultivu, Deolindo da Silva, reforsa planu munisipál ordenamentu mosu ho objetivu atu define ho forma ekilibrada no estratéjika ba utilizasaun espasu ba dezenvolvimentu atividade públika no privada ne’ebé sustentável haree hosi aspetu ekonómiku, sosiál, kulturál no ambientál.

“Ohin Bobonaro loke tán pájina foun ida kona-bá planu ordenamentu munisipál   territóriu, tanba ne’e ha’u apela ba imi hotu, atu fó onra no kompromisu ba ida-ne’e fó kontribuisaun, kolaborasaun no partisipasaun hodi garante susesu ba kualidade servisu ne’ebé hala’o iha munisípiu ne’e,” nia apela.

Iha fatin hanesan, Prezidente Autóridade Munisípiu Bobonaro, Ernesto de Oliveira Barreto, agradese ba governu tanba inklui ona munisípiu Bobonaro hAmutuk ho munisípiu haat sira seluk hahú determina no elabora planu ordenamentu munisípiu.

“Ne’e hanesan tempu di’ak tebes mai ita munisípiu Bobonaro hodi tuur hamutuk koordena haree ita-nia espasu sira ho di’ak, nune’e ita labele sai hanesan kapitál Dili, maibé ita buka atu kapitál Maliana dezeña ho modelu ne’ebé furak, prosperiedade ba sosiedade tomak,” nia garante.

Notisia Relevante:MPO-Autoridade Bobonaro diskute futuru sidade Maliana

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!