PR Horta simu karta kredensiál hosi Embaixadór Brunei Darusalam-Reinu España

DILI, 15 jullu 2022 (TATOLI)—Prezidente Repúblika (PR), José Ramos Horta, sesta ne’e, simu karta kredensiál hosi Embaixadór Brunei Darusalam, Wan Hadfi Lutfan Bin Haji Abdul Latif, no Embaixadór Non-Rezidente Reinu España, Francisco de Asis Aguilera Aranda, ne’ebé sei hala’o misaun iha Timor-Leste (TL).

“Ohin ha’u akompaña Prezidente Repúblika atu simu karta kredensiál hosi nasaun rua ida hosi Brunei Darusalam no ida hosi Reinu España,” Ministra Negósiu Estranjeiru no Kooperasaun (MNEK), Adaljiza Magno, hateten ba jornalista sira hafoin akompaña embaixadór na’in-rua iha Palásiu Prezidensiál Nicolau Lobato, Bairru Pite.
Hafoin aprezenta karta kredensiál, Emaixadór Brunei Darusalam ne’ebé akompañadu hosi Ministra Negósiu Estranjeiru no Kooperasaun (MNEK) hamutuk ho Xefe Estadu, José Ramos Horta, ko’alia asuntu bilateral iha área kooperasaun iha servisu áeru nian.
“Imi hotu hatene katak foin semana kotuk ha’u iha Brunei entaun ami ko’alia fila-fali komitmentu ne’ebé mak foin daudaun halo iha Brunei. Hanesan, ita asina tiha ona akordu servisu áeru ne’ebé mak Governu hosi Konsellu Ministru sei ba Parlamentu Nasionál atu ratifika. Ita bele hosi Brunei mós halo hotu prosesu doméstiku ita bele prosesa hotu ona sasán, ita hein katak aviaun rua iha Brunei bele semo mai regular,” nia dehan.
Parte rua diskute mós oinsá Governu Brunei kontinua kompromisu ba halo kooperasaun iha área saúde no edukasaun.
“Ezemplu, iha edukasaun sira uluk kedas fó bolsu estudu ba ita maibé sira-nia ezijensia aas liu sira presiza IELS mínimu maióriu sira husu hitu (7), sira ko’alia inglés. Entaun, foin daudaun ha’u iha ne’ebá, ha’u husu omólogu ministru, se bele hanoin fó fasilidade ba timoroan ne’ebé pasa fó hanesan kursu preparasaun antes tama iha universidade fulan tolu ka neen, ne’ebé sira aseita,” nia hateten.
Governante ne’e hatutan, ba área saúde iha Brunei baratu uitoan, se TL bele hanoin rai rua halo negosiasaun hodi haruka pasiente timoroan ba halo tratamentu tanba ladún dook no baratu.
Nune’e mós, iha enkontru ne’e ko’alia mós asuntu kona-ba oinsá Timor-Leste hametin liután relasaun bilaterál ho Reinu España.
“Reinu España nia embaixada laiha ne’e maibé sira iha Jakarta. Ami ko’alia barak liu oinsá rai rua ne’e bele halo diálogu polítiku tinan-tinan iha nível seniór officer to’o ministeriál no mós haree kona-ba oinsá investimentu rai ne’eba nian mai iha Timor. Ho ida-ne’e sujere ho sira ko’alia ho TradeInvest, depois rai rua ne’e Prezidente Repúblika husu sira bele apoiu kandidatura Timor nian ba iha konsellu direitu umanu,” nia dehan.
Nia fó sai katak, durante ne’e Timor-Leste halo kooperasaun ona ho Reinu España ne’ebé liu hosi Uniaun Europeia (UE) tanba Reinu España sira-nia fundu hotu-hotu liu-hosi UE. Bibán ne’e, Prezidente Repúblika, José Ramos Horta, sente haksolok tebes ho kooperasaun bilaterál hirak ne’e.
Jornalista : Nelson de Sousa
Editór : Cancio Ximenes

