DILI, 15 jullu 2022 (TATOLI)—Prezidénsia Repúblika, sesta ne’e, realiza feira libru ho tema “O Livro é uma Janela para o Mundo” hodi komemora aniversáriu Comunidade dos Países de Língua Portuguesa (CPLP) ba dala-26 iha jardin Palásiu Prezidnsiál Nicolau Lobato, Bairru Pite, Dili.
Feira livru ne’e realiza, Prezidénsia Repúblika kolabora ho Ministéiru Edukasaun Juventude no Desportu (MEJD), Emabixada Portugál iha Dili, Iinstitutu Camoes no organizasaun sosiedade sivíil Care Internasionál, Oxfam, Timor Aid ho seluk tan.
“Feira livru ne’e kria interrese ba leitura no halo promosaun ba leitura, neineik ita bele haree ita-21:16:02nia sosiedade sei muda no hotu-hotu gosta leitura,” Prezidente Repúblika, José Ramos Horta hateten ba jornalista sira iha ámbitu abertura feira livru iha jardin Palásiu Prezidensiál Nicolau Lobato.
Xefe Estadu ne’e hateten, iha Timor-Leste sei menus livru to’o ba labarik sira atu aprende lee, nune’e Governu liuhosi ministéiru relevante presiza haree ida-ne’e.
“Dezáfiu ida mak folin livru karun. Tanba ne’e, Governu tenke buka meiu atu halo livru sira ne’ebé bele asesivel tuir ida-idak nia ekonómia,” nia hateten.
Produtu literária barak di’ak, nune’e presiza promove mós feira hanesan ne’e ba labarik sira no mós ba sosiedade tanba sosiedade ladun iha ábitu lee.
“Ha’u-nia preokupasaun mak ne’e, Governu atu haree labarik oan sira gosta leitura feira livru ida-ne’e mós atu haree ba preokupasaun. Iha ne’e la’ós de’it ba labarik sira, maibé ba sosiedade tomak,” nia hateten.
.
Iha fatin hanesan, líder karismátiku, Kayarala Xanana Gusmão, hato’o parabeniza ba Prezidente Repúblika ne’ebé bele realiza feira ne’e.
“Feira livru ida-ne’e hau aseita kria oportunidade furak ba jerasaun foun atu lee, ne’e importante. Produtu leitura ajuda loke ita-nia oin ba mundu no ita-nia mehi ba realidade. Hein katak feira livru ne’e bele motiva labarik sira iha ne’e, ita-nia jerasaun kuda kultura lee tanba lee livru importante tebes,” nia hateten.
Enkuantu, dezenvolvimentu sektór edukasaun hanesan pontu importante ida atu prepara rekursu umanu ida-ne’ebé kualidade no matenek hodi kontinua dezenvolve Timor-Leste ba futuru ida-ne’ebé nabilan.
Maske hasoru difikuldade no dezafiu ne’ebé barak, maibé entidade relevante sira sempre iha hanoin ida hodi kontinua dezenvolve setór edukasaun, maske neineik maibé beibeik tanba Timor-Leste opta polítika ida de’it iha setór edukasaun katak “Edukasaun Universál ba ema hotu” hanesan hakerek nanis ona iha Konstituisaun RDTL, Artigu 59.
Atu garante edukasaun ida kualidade ba timoroan hotu, Governu liuhosi Parlamentu Nasionál kada tinan sempre aprova orsamentu tuir nesesidade setór edukasaun nian tuir planu programa prioridade hosi Ministériu Edukasaun rasik, liu-liu dezenvolvimentu infraestrutura eskolár, formasaun profesór sira no seluk tan.
Setór edukasaun mak hanesan xave ba dezenvolvimentu iha futuru mai, nune’e Prezidente Repúblika, José Ramos Horta rasik mós hato’o iha nia diskursu bainhira selebra loron restaurasaun Independénsia 20 maiu 2022 katak, dezenvolvimentu setór edukasaun mós sai prioridade ida hanesan ho prioridade sira seluk durante mandatu Prezidente Repúblika tinan lima mai.
Atu garante kompromisu Prezidente Repúblika nian ba área edukasaun, nune’e asesó ba asuntu Edukasaun nian prepara planu programa “Feira do Livro” hanesan programa inisiál ida hodi korresponde ba kompromisu ne’ebé hola parte ba loron atus ida (100) servisu Prezidénsia Repúblika nian iha área edukasaun nian.
Programa “Feira do Livro” mós hetan aseitasaun hosi Prezidente Repúblika, nune’e Asesór ba asuntu edukasaun ne’ebé lidera husi Asesóra Dulce de Jesus Soares ho ekipa realiza kedas reuniaun maratona hamutuk ho parseiru xave sira ba implementasaun programa Feira do Livro ne’e.
Feira livru ho tema: “O Livro é uma Janela para o Mundo” ne’e sei implementa iha ámbitu loron komunidade CPLP nian. Programa ne’e sei hala’o iha Jardin Palásiu Prezidensiál, durante loron rua ho balun, no sei hahú iha tuku 15h00 lorokraik, loron 15 to’o loron 17 fulan-jullu tinan 2022.
Eventu Feira do Livro mós sei aprezenta livru ho títulu oioin no livru hirak ne’e mós sei promove ho lian ofisiál tetun no portugés, ne’ebé sei oferese hosi ajénsia no pesoál sira ho folin baratu, nune’e públiku sira liu-liu estudante no komunidade eskolár sira bele iha kbiit hodi sosa.
Iha programa Feira do livro rasik mós sei promove talentu estudante sira-nian durante feira ne’e la’o liu-hosi aprezentasaun múzika, dansa, poezia no seluk tan, hosi eskola hirak ne’ebé indika tiha ona hosi munisípiu Dili, Aileu, Likisa no Manatuto no ba futuru sei abranje ba munisípiu sira hotu.
Objetivu hosi eventu ne’e mak, promove lingua ofisiál, promove vontade lee livru ba estutante sira, promove lasu amizade entre estudante hosi eskola oioin no promove talentu estudante sira-nian.
Jornalista : Nelson de Sousa
Editór : Cancio Ximenes
