VIQUEQUE, 15 jullu 2022 (TATOLI)—Diresaun Servisu Sosiál munisípiu Viqueque rejista benefisiáriu ba subsídiu idozu hamutuk na’in-9.722 mak simu direitu.
“Dadus ne’e inklui ona ho inválidu, maibé ami la indetifika dadús inválidu. Dadus hosi lista tuan hamutuk na’in-9.293 no lista foun totál hamutuk na’in-429, nune’e totál hamutuk na’in-9.722,” Diretór Servisu Sosial Munisípiu Viqueque, Paulo Menezes, informa ba Agência Tatoli, iha ninia knaar fatin, iha postu Viqueque vila, sesta ne’e.
Notísia relevante: Faze dahuluk ba pagamentu idozu-invalidéz hahú ho $50
Prosesu pagamentu faze dahuluk ba idozu iha munisípiu Viqueque, hahú loron 07 jullu 2022 to’o agora, ne’ebé sei kontinua iha postu Viqueque vila.
“Pagamentu faze dahuluk ami hamutuk ho Banku Nasionál Komersiál Timor-Leste (BNCTL-sigla portugés)hahú iha fulan jullu, ne’ebé agora sei halo pagamentu iha postu administrativu Viqueque vila,” nia akresenta.
Pagamentu dahuluk iha suku Bibileo ho benefisiáriu tuan na’in-176, benefisiáriu foun na’in-lima, nune’e totál benefisiáriu hamutuk 181, pagamentu ba benefisiáriu hosi suku Luka na’in-170 mak simu ona subsídiu, suku Bahalara Uain iha benefisiáriu hamutuk 404 simu ona diretu idozu, suku Uma-kiik ho totál benefisiáriu hamutuk na’in-223 no suku Fatudere iha benefisiáriu idozu hamutuk na’in-51.
Nune’e, ekipa BNCTL daudaun sei halo pagamentu ba benefisiáriu hamutuk na’in-240 iha suku Uma-uain Leten.
Enkuantu, pagamentu idozu iha postu Viqueque vila iha loron 25 jullu, ne’ebé sei kontinua ba postu Uatulari, Lacluta, Ossu no Uatucarbau.
“Pagamentu ba kada idozu dadaun fulan-ida $50, ne’e kada benefisiáriu simu $300 ba fulan-neen. Ami nafatin fó korajen ba idozu sira ne’ebé naran seidauk sai, bele lori dokumentu ba ami hodi halo prosesu komfirmasaun iha baze dadus iha munisípiu to’o nasionál hodi hetan direitu,” nia tenik.
Tuir dadus, benefisiáriu hosi postu Viqueque vila na’in-2.375, postu Lacluta na’in-1.061, postu Uatucarbau na’in-1.056, postu Uatulari na’in-2.670 no postu Ossu na’in-2.131.
Jornalista : Vitorino Lopes da Costa
Editora : Julia Chatarina
