HEADLINE, INTERNASIONÁL, NASIONÁL, POLÍTIKA, SAÚDE

Cuba-Timor-Leste selebra aniversáriu relasaun bilaterál dala-XX ho atividade desportiva

Cuba-Timor-Leste selebra aniversáriu relasaun bilaterál dala-XX ho atividade desportiva

Reprezentante Embaixada Cuba iha Timor-Leste, José Ernesto Dias Perez. Imajen TATOLI/Antónia Gusmão

DILI, 16 jullu 2022 (TATOLI)—Sekretáriu Estadu Juventude no Desportu (SEJD), Abrão Saldanha, hateten Governu Cuba liuhosi Embaixada Cuba iha Dili selebra aniversáriu kooperasaun Cuba ho Timor-Leste ba dala-XX ho atividade desportiva ho tema “Cayman to Cayman” ka “ema ba ema” ka “maun-alin ba maun-alin”.

“Komemorasaun ne’e ami eskolla atividade fízika hanesan desportu rekreativa ho objetivu atu promove atividade fizíka ne’e ba populasaun ein jerál katak saúde ne’e la’ós ospitál, klínika, la’ós de’it aimoruk no daun maibé iha ida mak estilu vida ida-ne’ebé saudavel liuhosi atividade fíziku loro-loron no rekreasaun loro-loron,” Governante ne’e hateten ba Agência TATOLI, iha ámbiru komemorasaun aniversáriu relasaun bilaterál Cuba no Timor-Leste ba dala-XX, iha resintu Sekretaria Estadu Juventude no Desportu, Lecidere, sábadu ne’e.

Ho atividade desportivu ne’e, nia hatutan, la’ós kompetisaun hodi manán prémiu boot maibé nu’dar atividade rekreasaun oinsá mak book-aan, hodi promove no bolu atensaun públiku nian oinsá tau importánsia ba atividade fízika ne’e ba ema-nia moris.

Atividade desportiva ne’e partisipa hosi ekipa Embaixada Cuba ho brigada médika Cubana, ekipa Organizasaun Nasaun Unida (ONU), Embaixada sira, estudante, komunidade balun, membru grupu arte mrsiál ho grupu oioin no ema ho defisiénsia.

“Prátikamente atividade ida ne’e ba ema hotu-hotu nian, “ nia dehan.

Atividade desportiva hirak ne’e mak korida mini maratona, halai bisikleta, korida obstákulu, volillet ball, futsal, Aerobika, konsulta saúde masál no atividade sira seluk tan.

Reprezentante Embaixada Cuba iha Timor-Leste, José Ernesto Dias Peres, senti orgullu tebes ho atividade ne’e.

“Atividade ne’e realiza hodi komemora aniversáriu relasaun bilaterál Cuba no Timor-Leste nian. Ami apresia tebes ho apoia hosi Sekretáriu Estadu Juventude no Desportu, Abrão Saldanha, no reprezentate ONU nian iha Timór, espera partisipante sira kontente ho atividade ne’e,” nia hateten.

Iha fatin hanesan, Koordenadór ONU iha Timor-Leste, Roy Trivedy, lori ONU nia naran sente orgullu hodi partisipa iha eventu importante ne’e.

“Sente kontente tebes partisipa iha eventu ne’e. Eventu ne’e importante tebes tanba selebra parseria entre Cuba ho Timor-Leste. ONU sente kontente atu ajuda selebrasaun ne’e. Parabéns ba Sekretáriu Estadu Juventude no Desportu no obrigadu ba Ministra Saúde tanba partisipa ona. Partisipasaun ema hotu nian iha eventu ne’e di’ak tebes, nune’e hodi enkoraja labarik sira, adultu ema ho defisiénsia,” nia dehan.

Jornalista : Antónia Gusmão

Editór         : Cancio Ximenes

iklan
iklan

Leave a Reply

iklan
error: Content is protected !!