Governu Cuba apoia SEJD prepara atleta Timor-oan
DILI, 16 jullu 2022 (TATOLI)—Sekretáriu Estadu Juventude no Desportu (SEJD), Abrão Saldanha, hateten Governu Cuba durante ne’e apoia Governu Timor-Leste liuhosi SEJD hodi prepara atleta timor-oan sira liuhosi formasaun oioin.
“Governu anteriór lori tékniku sira hosi Cuba mai prepara atleta timor-oan sira liuhosi treinamentu,” Sekretáriu Estadu ne’e hateten ba Agência TATOLI, iha resintu SEJD, Lecidere, sábadu ne’e.
Nivel desportu nian, SEJD mós prepara buat ida bolu naran prestasaun desportiva, tékniku sira hosi Cuba ne’e balun hanesan treinadór no analista.
“Sira bele ajuda fó treinamentu ba timor-oan sira no analiza estatutu atleta sira-nian hodi dezenvolve di’ak liután atleta sira,” nia dehan.
Alende ne’e, liuhosi kooperasaun SEJD nian lori tan profesór na’in-neen ajuda hanorin iha Universidade Nasionál Timor Loro-sa’e (UNTL), Departamentu Edukasaun Fízika no Desportu.
Nia hatutan, apoia ne’ebe hosi Cuba barak liu dezenvolve rekursu umanu, liuhosi partisipasaun sira-nian iha UNTL.
“Sira ajuda haree mós kurríkulu no hanorin iha UNTL, nune’e hodi prepara profesór edukasaun fízika nune’e hanorin iha eskola,” nia hateten.
Jornalista : Antónia Gusmão
Editór : Cancio Ximenes
