COVALIMA, 15 jullu 2022 (TATOLI)— Ministru Justisa (MJ), Tiago Amaral Sarmento, hato’o apresiasaun ba Guarda Prizionál Suai tanba halo serbisu di’ak tebes hodi kontrola no asegura dadur sira iha situasaun inundasaun foin lalais ne’e.
“Ha’u hakarak fó apresiasaun tanba iha momentu inundasaun bele evakua dadur sira iha prizaun Suai na’in-118 ba fatin ne’ebé seguru, ne’e la’ós buat fasil nune’e ha’u hakarak louva Diretór Estabelesimentu Prizionál Suai no membru tomak,” Ministru Justisa ne’e hateten bainhira halo vizita traballu ba prizaun Suai, sesta ne’e.
Notísia relevante: Bee tama prizaun Covalima: dadur 118 evakua ba aeroportu Kay Rala Xanana Gusmão
Governante ne’e dehan, iha momentu inundasaun no bee tama prizaun Suai ne’e hamosu preokupasaun boot tanba risku ba vida prizoneiru no bele mós dadur-sira halai sai.
“Ha’u preokupa tebes ho situsaun ne’e no halo ha’u nia fuan tuku-tuku, tanba foin dahuluk bee tama prizaun ne’ebé bele mosu situasaun ladi’ak hanesan prizioneiru balun bele halai sai, balun bele mate iha prizaun laran tanba sirkuitu eletrisidade no fó risku mós ba Guarda Prizioneiru sira,” nia afirma.
Governante ne’e dehan kuandu prizioneiru balun maka mate iha prizaun laran, otomatikamente Ministru Justisa maka lori todan no bainhira halo evakuasaun ba prizioneiru sira iha situsaun emerjénsia tenke tuir lei haruka.
“Momentu ne’ebá ha’u simu telefone hosi husi Diretór Estabelesimentu Prizionál Suai, ha’u komunika kedan ba Ministériu Públiku Suai no Ministériu relevante sira seluk hodi fó apoia ba evakuasaun dadur sira ba fatin seguru no konsege reintegra fali ba prizaun ho susesu,” nia esplika.
Notísia relevante: Membru PNTL 30-resin fó seguransa ba dadur 118 iha aeroportu Covalima
Nune’e, Ministru Tiago husu ba Guarda Prizionál sira kontinua hatudu serbisu ne’ebé di’ak hodi asegura prizioneiru sira tuir lei haruka.
Iha biban hanesan, Diretór Estabelesimentu Prizionál Suai, Júlio Dias Ximenes, agradese ba Ministru Justisa tanba bele halo vizita traballu iha prizaun Suai hodi haree direta serbisu, preokupasaun no limitasaun ne’ebé iha.
“Ha’u agradese tanba Ministru Justisa bele mai vizita prizaun Suai hodi haree besik prolema no rona preokupasaun ne’ebé iha, nune’e ba oin iha hotu hamutuk ho Ministru Justisa nia tulun bele bele rezolve,” Diretór ne’e agradese.
Guarda Prizionál iha Prizaun Suai hamutuk 37, mak durante ne’e asegura prizioneiru na’in-118, kompostu husi prizioneiru kondenadu 83, prizaun preventiva 35.
Enkuantu prizoneiru na’in-lima mak ema ho defisiénsia fíziku, na’in-rua ema ho defisiénsia mentál inklui kondenadu eis polÍsia nain-neen
Notísia relevante: MJ sei konstrui kazerna no sosa farda ba Guarda Prizionál Suai
Jornalista: Natalino Costa
Editór : Florencio Miranda Ximenes
