Desizaun inaugura Ponte Nelson Mandela Laleia tenke liuhosi Konsellu Ministru

DILI, 18 jullu 2022 (TATOLI)-Vise Ministru Administrasaun Estatál (MAE), Lino de Jesus Torrezão, hateten desizaun atu inaugura ponte Nelson Mandela Laleia ne’e liuhosi desizaun Konsellu MInistru maibé sei haree iha semana ida-ne’e.
Notísia Relevante: Laleia-oan husu Governu tau Don Martinho Lopes nia naran ba ponte Laleia
“Kona-ba ponte Laleia ne’e, tenke liuhosi desizaun Konsellu Ministru,” Governante ne’e hateten ba Agência TATOLI, relasiona ho loron internasionál Nelson Mandela ne’ebé selebra iha loron 18 jullu kada tinan, iha Ministériu Finansa, Dili.
Atu hatene kle’an liu, nia dehan, tenke konfirma kle’an liu ba Ministru Administrasaun Estatál (MAE), Migual Pereira de Carvalho, atu esplika kle’an kona-ba asuntu ne’e.
Ministru Administrasaun Estatál, Miguel Pereira de Carvalho, hateten ponte Laleia ne’e naran toponomia ida-ne’ebé mak Konsellu Ministru aprova hodi tau naran Nelson Mandela ba obra ne’e.
“Tuir dalan legál nian, ita bele hanaran ponte Nelson Mandela. Loron Nelson Mandela nu’udar loron moris antigu Prezidente Afrika do Sul, Premiadu Nobel da Paz no Defensór boot kauza Timor-Leste nian, nune’e ita só selebra de’it loron nasionál sira iha ita-nia rain,” nia dehan.
Notísia Relevante: Muda naran Ponte Laleia, Ministru Salvador: “depende desizaun Governu”
Naran Nelson Mandela ne’ebé tau ponte Laleia nia naran ne’e hanesan toponomia ida hodi tau ba fatin sira iha Timor-Leste.
“Hanesna ita-boot sira haree iha travesa Sergio Vieira de Mello iha Faról, tanba ne’e ita só tau de’it ba obra sira, sei la selebra loron ida-ne’e,” nia hateten.
Konstrusaun ponte laleia hahú iha loron 18 Agostu 2016, ne’ebé toma konta hosi kompañia Shanghai Group Ltd hosi Xina, hafoin pasa iha prosesu aprovizionamentu ne’ebé han tempu kuaze tinan-rua.
Governu kontrata konsultór hosi Japaun, Filipina no Indonézia hodi kontrola obra. Grande projetu ne’e tama iha pakote I konstrusaun estrada Dili-Manatuto no pakote II konstrusaun ponte Manatuto liga ba Munisipiu Baucau.
Projetu pakote I uza fundu empréstimu hosi Japan Internasional Cooperation of Agency (JICA) ho totál orsamentu millaun $48,3, enkuantu pakote II hosi fundu empréstimu Asian Development Bank (ADB) ho totál millaun $59,2.
Notísia Relevante: Governu deside troka naran ponte Laleia sai ‘Nelson Mandela’
Jornalista : Osória Marques
Editór : Cancio Ximenes

