DILI, 18 jullu 2022 (TATOLI)– Ekipa konjunta Servisu Sekreta kompostu hosi Servisu Informasaun Polisia (SIP) Nasionál, Servisu Nasionál Intelijénsia (SNI) no Seksaun Investigasaun Kriminál Munisípiu Covalima, halo vizilánsia hodi detein timoroan nain-4 hatama mina ilegál liuhosi área tasi ibun Salele, Aldeia Ai-Oan, Suku lalawa, postu-administrativu Tilomar, munisípiu Covalima.
Suspeitu timoroan nain-4 ne’e ho naran inisiál, MA (tinan 30), AN (tinan 21), FN (tinan 17), no suspeitu ne’ebé ho motór sai mata-dalan maka JC (tinan 18).
“Prosesu detensaun ne’e kategoria hanesan “flagrante de lito” ba suspeitu nian-haat iha kareta marka Rava ho xapa matríkula 20.558 ne’ebé tula kombustivel iha karreta lara inklui suspeitu ho motór honda Supra X 125 kór-mean ne’ebé sai mata-dalan iha prosesu transaksaun ilegál ne’e,” refere nota ne’ebé Agência TATOLI asesu, segunda ne’e.
Hafoin halo inkeritu suspeitu sira deklara sai nain ba mina ne’e ho naran inisial AM (tinan 26), husi Aldeia Ahinarai, Suku Debos ne’ebé pertense ba Postu-Administrativu Suai-Vila no nia sai hanesan Matadalan hodi observa situasaun durante transaksaun.
Daudaun suspeitu no objetu kontra bandu hirak ne’e asegura ona iha Komandu Munisípiu Covalima hodi kontinua halo prosesu investigasaun.
Alende ne’e, Hafoin simu informasaun hosi fonte kredivél, Polisia Nasionál Timor-Leste (PNTL), liuhosi Servisu Informasaun Polisia (SIP) Nasionál no Munisipál junta hamutuk ho SNI destakadu iha Munisípiu Covalima, detein mós timoroan mane ida ho naran inisiál AG (tinan 22), ne’ebé halo transaksaun ilegál ba motór ida ho tipu Honda Sonic 150R, iha fronteira terestre Timor-Leste ho Indonézia.
Suspeitu AG, ekipa konjunta halo vizilánsia durante oras haat nia laran no detein iha tuku 1:08 kalan, 17 jullu 2022, bainhira halo transaksaun iha tasi ibun aldeia Ai-Oan, suku lalawa, postu-administrativu Tilomar, munisipiu Covalima.
Iha prosesu identifikasaun suspeitu AG deklara, nia sosa motór ne’e hosi Indonézia ho montante osan $900.00 no modus ne’ebe sira uza maka tula hosi Ró Jhonson mai hatun iha tasi ibun Lagoa Maria maka nia ba simu rasik iha Tasi ibun hodi mai rai maran.
Daudaun ekipa konjunta entrega ona evidénsia no suspeitu AG ba iha Servisu Investigasaun Kriminal (SIK) Munisipiu Covalima, hodi kontinua halo prosesu investigasaun.
Jornalista: Natalino Costa
Editór : Florencio Miranda Ximenes
