Ema deskoñesidu taa pasajeiru ida iha Uatulari
VIQUEQUE, 18 jullu 2022 (TATOLI)—Ema deskoñesidu taa pasajeiru ida ne’ebé konduz karreta angguna, iha postu Uatulari, munisípiu Viqueque, segunda ne’e, maizumenus tuku 00:56.
Komadante interinu Polísia Nasionál Timor Leste (PNTL) Eskuadra postu Uatulari, Segundu Sarjentu, Celestino Pinto, haktuir, vítima hetan asaltu no tentativa omesidu.
“Ema ne’e deskoñesidu no falun-an maka taa pasajeru ida naran Fulgencio iha parte liman kabun kotuk iha parte loos. Nune’e, kalan ne’e ami ba fatin akontesimentu ne’ebá, maibé ema ne’e halai lakon tiha, ami la konsege kaptura,” Komadante interinu PNTL informa ba Agência Tatoli, via telefónika, segunda ne’e.
Notísia relevante: PNTL-VPU Viqueque rejista kazu hamutuk 111 iha janeiru-novembru
Vítima ho karreta hosi Uatucarbau atu bá Viqueque vila, maibé bainhira to’o iha área Uaidae baliza ho suku Uaitame no suku Matahoi, ema deskoñesidu taa vítima iha karreta laran.
“Ema deskoñesidu ne’e kala hamriik iha dalan no taa vítima de’it iha ninia liman loos. Kazu ne’e ohin dadeer ami bá buka tuir informasaun iha fatin akontesimentu, maibé seidauk hetan nune’e kazu ne’e sei iha prosesu investigasaun nia-laran,” nia akresenta.
Iha fatin akontesimentu hodi kalan, autoridade seguransa sira lori kedas vítima bá sentru saúde Uatulari no vítima hetan ona tratamentu hosi profisionál saúde no daudaun suku ona vítima nia liman.
“Daudaun situasaun Uatulari la’o normál hela, ami PNTL sei kontinua nafatin buka informasaun hosi parte komunidade, nune’e ami bele kaer autór sira ne’ebé halo asaltu,” nia dehan.
Jornalista : Vitorino Lopes da Costa
Editora : Julia Chatarina
