DEFEZA, HEADLINE

EUA-TL lansa ezersísiu militár konjuntu “Dalan ba Dame 22”

EUA-TL lansa ezersísiu militár konjuntu “Dalan ba Dame 22”

Membru militár sira hosi ezérsitu Estadu Unidu Amérika (EUA) no FALINTIL-Forsa Defeza Timor-Leste (F-FDTL) hasai foto hamutuk iha lansamentu ezerísiu militár “Dalan ba Dame 22”. Imajen/espesiál

DILI, 18 jullu 2022 (TATOLI)– Membru Militár sira hosi ezérsitu Estadu Unidu Amérika  (EUA) no FALINTIL-Forsa  Defeza Timor-Leste (F-FDTL), segunda ne’e, lansa ona “Dalan ba Dame 22 (“Path to Peace”)”, ezersísiu militár konjuntu daruak entre ezérsitu sira hosi Timor-Leste no Estadu Unidu Amérika.

Ezersísiu militár ne’e sei hala’o iha loron 18 to’o 28 jullu iha baze Komponente Terrestre F-FDTL nian iha Baucau.

“Ezersísiu Dalan ba Dame nu’udar ezemplu importante ida kona-ba oinsá Estadu Unidu Amérika no Timor-Leste hakle’an liután ami-nia parseria rohan la’ek,” Vise Xefe Misaun Interinu Estadu Unidu Amérika nian, Roy Srinivasan, liuhosi nota ne’ebé Agência TATOL asesu.

Estadu Unidu Amérika (EUA)sente orgullu halo parseria ho F-FDTL hodi dezenvolve Timor-Leste nia kapasidade ba seguransa marítima, asisténsia umanitária, no responde ba dezastre.

Ezersísiu konjuntu ba dala rua ne’e reforsa kompromisu Estadu Unidu Amérika nian hodi serbisu hamutuk ho Timor-Leste atu hatán ba dezafiu hirak ne’ebé nasaun rua ne’e hasoru.

Ezersísiu ida-ne’e,  patrosina husi Estadus Unidu Amérika nia ezérsitu iha pasífiku, envolve membru sira militár EUA besik nain-50 no F-FDTL nain-100, ho objetivu hasa’e kapasidade interoperabilidade liuhusi treinamentu no interkámbiu kulturál.

Treinamentu ne’e inklui interkámbiu asuntu espesializadu no hala’o semináriu dezenvolvimentu profisionál ne’ebé foku ba abilidade báziku sira infantaria nian hanesan patrullamentu, navegasaun terrestre, no abilidade sobrevivénsia iha ai-laran.

Ezersísiu ida-ne’e,  dezenvolve bazeia ba parseria ne’ebé aumenta entre Estadu Unidu Amérika no Timor-Leste no promove liután kooperasaun seguransa hodi apoia rejiaun Indo-Pasífiku ida ne’ebé livre no nakloke.

Dalan ba Dame 22 ne’e,  dezenvolve bazeia ba parseria seguransa entre EUA no Timor-Leste, liuliu Estadu Unidu nia kompromisu osan millaun $10-resin hodi hamutuk ho Governu Timor-Leste reabilita aeródromu Baucau.

Liuhusi kria Komponente Aéreu ida, projetu ne’e sei fó asisténsia ba F-FDTL no ajuda Governu Timor-Leste hodi monitoriza di’ak liután ninia territóriu marítimu, fornese asisténsia umanitária no promove dezenvolvimentu ekonómiku.

EUA mós hala’o ezersísiu militár anuál hamutuk tolu ho F-FDTL no simu membru militár Timoroan barak iha Estadu Unidu hodi aprende lian Inglés no hetan edukasaun profisionál militár nian.

Alende ne’e, EUA nia Navál Seabees konstrui no reabilita ona klínika no eskola 100-resin iha Timor-Leste hodi ajuda hari’i futuru ida ne’ebé di’ak liu ba Timoroan sira, sira mós kompleta ona projetu lubuk ida ho valór millaun $50-resin iha tinan 10 nia laran.

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!