Governu halo konsultasaun públiku PED iha Covalima
COVALIMA, 18 jullu 2022 (TATOLI)–Governu liuhosi Ministériu Planeamentu Ordenamentu Teritoriál halo konsultasaun públiku reajustamentu Planu Estratéjiku Dezenvolvimentu (PED) 2011-2030 ho autoridade sira iha munisípiu Covalima.
Sekretáriu Administrasaun Munisípiu Covalima, Francisco de Jesus Alves, hateten objetivu prinsipál hosi reajustamentu PED ida-ne’e, atu lejitima povu-nia ambisaun no mehi sira ba moris di’ak liuhosi dezenvolvimentu sustentavél iha setór hotu hanesan dezenvolvimentu setór produtivu sira.
“Atu hamenus ita-nia dependénsia fundu petroliferu asegu empregu no rendimentu sustentavél ba povu-nia moris di’ak no dignu, tanba ne’e ekipa téknika halo konsultasauun públiku ba reajustamentu PED 2011-2030 atu bele rona no rekola povu nia aspirasaun no mehi-sira hodi garante prosesu dezenvolvimentu ida ne’ebé integradu, inkluzivu no sustentavél ba realizasaun futuru Timor-Leste ne’ebé di’ak liu tuir povu nia mehi,” Sekretáriu Administrasaun Munisípiu Covalima, Francisco de Jesus Alves, hateten liuhosi lee Vise Ministru Negosiu Estranjeiru no Kooperasaun (MNEK), Julião da Silva, nia mensajen iha salaun Administrasaun Covalima, segunda ne’e.
Ho nune’e haree ba setór rekursu umanu, bazea mehi ba realidade no potensialidade rekursu umanu Governu mesak sei labele halo dezenvolvimentu hodi bele realiza mehi moris di’ak ba povu, ema hotu tenke dedika an tomak hodi partisipa ativu iha prosesu dezenvolvimentu liuhosi ida-idak nia knar, nune’e partisipasaun importante iha konsultasaun.
Aleinde haree ba setór rekursu naturál presija mós fó hanoin no kuñesementu opiniaun kona-ba munisípiu Covalima nia área potensialidade bele kontribui ba dezenvolvimentu nasionál.
“Ita-boot sira mak autór dezenvolvimentu iha Munisípiu, suku no aldeia sira. Ita-boot sira mak hatene di’ak kona-ba komuniade sira-nia moris, nune’e bele hato’o aspirasaun ba dezenvolvimentu futuru Timor-Leste,” nia dehan.
Governu implementa Planu Estratéjiku Dezenvolvimentu (PED) hanesan matadalan ba prosesu dezenvolvimentu nasionál ne’ebé implemente ona planu estejiku ne’e durante tinan 10-resin ona.
Durante implementasaun PED tinan 10-resin ne’e, konsege atinje ona meta balun hanesan iha pilar kuadru institusionál nian atinje meta 19% hosi ida 33% mak iha progresu di’ak inklui aprovasaun kuadru legál sira, estabelesimentu embaixada sira iha rai-li’ur no progresu adezaun ba ASEAN.
Rezultadu avaliasaun hatudu katak meta barak seidauk atinje no balun seidauk hahú medida estratejiku sira-ne’ebé define iha planu ne’e barak jerál no balu la relevante ona ho situasaun atuál
“Ita hasoru dezafiu oioin liga ho problema dezempregu ita mós nafatin depende ba fundu petroliferu. Ita-nia prosesu dezenvolvimentu hasoru dezafiu barak liu-liu iha tinan rua ikus, ita hasoru pandemia COVID-19 no dezastre naturál sira,” nia informa.
Razaun ida-ne’e mós tanba planu estratéjiku dezenvolimentu la integra aspetu rejilénsia klimatika la konsege melora kapasidade hodi adapta reziste no rekupera fali hosi dezastre no pandemia ne’e.
Maske Governu halo esforsu hodi ajuda povu sira iha tempu defisil maibé la konsege apoiu povu ba tempu naruk, tanba ne’e tenke hanoin medida estratéjika sira hodi define estratéjia sira-ne’ebe integradu hodi responde ba situasaun atuál, no hasa’e rejilénsia hasoru risku sira hanesan pandemia no dezastre naturál sei akontese iha futuru tanba alterasaun mudansa klimátika.
Konsultasaun reajustamentu planu estratéjiku dezenvolvimentu ne’e partisipa hosi administradór postu administrativu sira, diretór munisipál, xefe aldeia no membru konsellu suku sira.
Jornalista : Celestina Teles
Editór : Cancio Ximenes
