DILI, 18 jullu 2022 (TATOLI)–Ministru Finansa, Rui Augusto Gomes, hateten, Governu kompromete selu hotu dívida iha operadór telekomunikasaun, Timor Telecom (TT) hamutuk millaun $5.
“Ami sei haree dívida sira ne’e mai hosi liña ministériu oinoin, sira tenki rezolve. Ami tenta atu rezolve dívida, ha’u rasik la gosta dívida, ne’ebé tenki selu,” Ministru hateten iha Palásiu Governu, segunda ne’e.
Governante ne’e dehan, hakarak ka lakohi Governu tenki selu tanba hanesan responsabilidade.
“Tenki selu, ita labele sai maupagador,” nia akresenta.
Notísia relevante: PR Horta Kontente Timor oan Jere Timor Telecom
Foin lalais, Prezidente Repúblika, José Ramos Horta, bainhira halo vizita ba edifísiu Timor Telecom, rona mós preokupasaun ne’ebé hato’o hosi dirijente sira relasiona ho dívida ne’ebé Estadu Timor-Leste seidauk selu.
Timor Telecom, S.A. eziste desde 17 outubru 2002, nu’udar sosiedade anónima dahuluk ne’ebé harii iha rai-laran, ne’ebé operadór telekomunikasaun ne’e fó ona serbisu ba timor-oan lubuk no fó apoiu ba atividade Governu no sosiál sira.
Iha loron 01 marsu 2003, Timor Telecom hahú hala’o operasaun iha Dili, Lospalos, Baucau no Oé-cusse.
Jornalista : Antónia Gusmão
Editora : Julia Chatarina
