DILI, 18 jullu 2022 (TATOLI)—Kooperativa Meusine Lifau (KOMELI) husu ba Sekretaria Estadu Kooperativa (SEKoop) atu fó apoiu finanseiru harii sede kooperativa.
Prezidente KOMELI, Manuel Tolan, hateten, KOMELI nu’udar kooperativa kréditu, ne’ebé hahú iha tinan 2004, maibé to’o agora sei seidauk iha fatin própriou ruma atu halo serbisu.
“Ami presiza fatin, tanba ne’e ami husu SEKoop atu fó apoiu orsamentu oituan atu ami halo ami-nia edifísiu, tanba rai iha ona maibé osan atu halo mak laiha,” Prezidente KOMELI relata ba Agência Tatoli via telefónika, segunda ne’e.
Notísia relevante: SEKoop inaugura sede kooperativa multisetoriál POLKOM Lautém
Daudaun ne’e, dirijente kooperativa prepara ona proposta atu haruka ba SEKoop atu apoiu fundu finanseiru $17.000 halo edifísiu.
“Bainhira ita iha ona edifísiu di’ak, bele ajuda halo serbisu iha fatin ida de’it no mellora di’ak liután ami-nia ezisténsia,” nia akresenta.
KOMELI rasik eziste desde tinan 2004, hahú ho membru ualu no to’o agora iha ona membru hamutuk 55, ne’ebé membru sira mai hosi agrikultór, negosiante no funsionáriu balun.
“Osan ne’ebé kada ema tau $25 no kada fulan ema iha tenke tau $5, to’o agora ami-nia osan hamutuk, $46.000,” nia informa.
Aleinde ne’e, atividade seluk ne’ebé kooperativa ne’e halo mak hakiak animál no fó aluga kadeira ba ema.
Vantajen hosi kréditu ne’e mak ajuda membru sira balun atu halo negósiu, halo uma, haree eskola, no atividade seluk, ne’ebé kréditu ne’e daudaun sei foku liu ba membru sira, seidauk bele atende ba públiku.
Jornalista : Arminda Fonseca
Editora : Julia Chatarina
