DILI, 03 Juñu 2026 (TATOLI)—Primeiru-Ministru, Kay Rala Xanana Gusmão, aprezenta kona-ba programa realizasaun Semana Nasionál Oseanu 2026, neʼebé hala’o husi loron 03 to’o loron 08 fulan-Juñu, ho atividade sira iha Dili, Ataúru, Lautein no munisípiu sira seluk ba reuniaun Konsellu Ministru, kuarta ne’e.
Notísia Relevante: Loron nasionál oseanu: Timoroan iha responsabilidade prezerva tasi sai patrimóniu nasionál
Inisiativa ne’e halo parte iha selebrasaun sira Loron Nasionál Oseanu (Tasi) nian dahuluk, ne’ebé selebra iha loron o5 fulan-Juñu, no termina ho selebrasaun Loron Mundiál Oseanu iha loron 08 fulan-Juñu.
Estabelese Loron Nasionál Tasi nian liuhusi Rezolusaun Governu nú. 67/2025, loron 24 fulan-Outubru, ho objetivu atu hasa’e konxiénsia kona-ba importánsia estratéjika tasi nian ba Timor-Leste, hodi promove protesaun ba ekosistema tasi, utilizasaun sustentável ba rekursu tasi nian no dezenvolvimentu ekonomia azúl.
Programa iha semana oseana
Nune’e, iha semana ida tomak, sei hala’o, atividade oioin ne’ebé foka ba sensibilizasaun, edukasaun, kultura, turizmu, desportu, konservasaun ambientál no valorizasaun ba patrimóniu marítimu nasionál.
Programa ne’e inklui inaugurasaun espozisaun fotográfika iha fatin-nakloke kona-ba Paseiu Marítimu Dili, Desfile Oseanu, Feira Oseanu, lansamentu Portál Ekonomia Azul, Feira Turizmu Marítimu, atividade limpeza tasi-ibun, husik lenuk, konkursu kulturál no edukativu, selebrasaun relijioza, atividade komunitária, nomós inisiativa konservasaun tasi.
Programa ne’e mós habelar ba eskola sira iha Timor-Leste laran tomak, liuhusi inisiativa sira ne’ebé hala’o hosi loron 01 to’o loron 08 fulan-Juñu 2026 ne’ebé foka ba edukasaun ambientál no protesaun tasi.
Notísia Relevante: Governu sei realiza karavana oseanu hametin kompromisu ba protesaun rekursu marítima
Jornalista : Alexandra da Costa
Editór : Cancio Ximenes
