DILI, 18 jullu 2022 (TATOLI)—Adjuntu Sekretáriu Jerál Partidu Fretilin no Prezidente Komisaun Nasionál ba Preparasaun no Organizasaun (KNPO), Flavio Maria Guterres, informa órgaun partidu deside ona lideransa Fretilin mandatu ba periódu 2022-2027 sei hili ka eleje liuhosi kongresu nasionál dalimak no sei la liuhosi eleisaun direta.
Notísia Relevante: FRETILIN sei realiza kongresu nasionál dalimak hodi hili estrutura foun
“Iha loron 28-29 maiu 2022 ne’e komite sentrál reuni fila-fali ajenda ida mak diskute kona-ba iha ka laiha posibilidade atu halo eleisaun direta ba lideransa, depois KNPO aprezenta tiha posibilidade ho nia kestaun orsamentu ho lojístika ba komite sentrál iha diskusaun ikus nia mosu desizaun por unanimidade konsensu hosi membru komite sentrál na’in-65 efeitu no membru 25 suplente deside katak lideransa Fretilin mandatu periódu 2022-2027 sei eleje de’it iha kongresu nasionál ba tinan ida-ne’e, laiha eleisaun direta ba lideransa Fretilin tantu Prezidente Partidu no Sekretáriu Jerál sei eleitu liu hosi kongresu nasionál,” Adjuntu Sekretáriu Jerál Partidu Fretilin, Flavio Maria Guterres, hateten ba Agência Tatoli iha nia knar fatin CCF, Comoro, segunda ne’e.
Estatutu Fretilin hatudu dalan atu hili lideransa Fretilin liuhosi dalan eleisaun direta signifika militante ida votu ida atu hili Prezidente Partidu ho Sekretáriu Jerál maibé karik iha razaun justifika katak labele halo eleisaun direta, ezemplu finanseiru partidu nian la permite no kestaun lojístika entaun órgaun sentrál partidu bele deside atu hili lideransa partidu ne’e eleitu liu hosi kongressu nasionál.
Tanba ne’e, reuniaun Comité Central Fretilin (CCF) foin daudaun ne’e tetu tiha ona kestaun finanseiru no lojístika partidu nian, entaun deside katak lideransa Fretilin ba mandatu 2022-2027 ne’e eleitu liu hosi kongresu nasionál dalimak.
“Tan ne’e mekanizmu liuhosi kongressu ne’e oin seluk to’o tempu kongresu 20% delegadu sira bele aprezenta pakote. Signifika Prezidente Partidu ho Sekretáriu Jerál hamutuk de’it iha lista ida hodi aprezenta hafoin komisaun verifika rekezitu sira kumpre ona prontu aprova prosede ba votasaun. Maibé agora seidauk hatene pakote hira mak sei mosu, nune’e to’o loron kongresu mak ita bele haree delegadu sira organiza malu atu aprezenta pakote sira. Purtantu, ita iha rekezitu hanesan baibain estatutu dehan tenke timoroan, militante fretilin, kondisaun saúde di’ak, kumpre mandatu órgaun sentrál partidu nian mandatu ida,” nia esplika.
Uluk, nia dehan, iha 2011 ho 2017 halo eleisaun direta dala-rua ona ba lideransa Fretilin mezmu iha pakote ida de’it ne’ebé eleisaun direta signifika mákina eleitorál partidu nian forma mós ekipa sira to’o ba baze ne’ebé organiza eleisaun ho modelu hanesan ho eleisaun sira-ne’ebé Estadu organiza ne’ebé iha sentru votasaun, estasaun votasaun, brigada eleitorál, fiskál kandidatu sira-nian. Maibé haree ba kestaun finanseira no lojístika, tinan ne’e labele hala’o eleisaun direta.
Enkuantu, reuniaun komisaun polítika nasionál iha 19 setembru 2021 hodi harii Komisaun Nasionál ba Preparasaun no Organizasaun (KNPO) no konfirma iha reuniaun komite sentrál iha 25 setembru 2021, konfirma desizaun ida-ne’ebé komisaun polítika nasionál halo hodi harii KNPO.
KNPO ho nia kompozisaun Prezidente, Vise Prezidente na’in-rua, ho nia knar mak servisu organiza eleisaun prezidensiál, lejislativa no organiza kongresu nasionál hili lideransa Fretilin nian mandatu 2022-2027.
Atu prepara kongresu nasionál mak hahú kedas hosi fulan outubru 2021 konferénsia postu administrativu, konferénsia munisipál, hodi hili estrutura komisaun polítika no sekretariadu postu administrativu no hili delegadu mai konferénsia munisipál no delegadu sira reuni fali iha munisípiu hodi eleje órgaun komisaun polítiku, komisaun juridisaun no komisaun fiskalizasaun munisipál. Iha konferénsia munisípiu eleje delegadu mai kongressu no eleje mós potensiál kandidatu mai iha menbru komite sentrál, portantu hirak ne’e mak akontese kongresu munisípiu sira.
“Prosesu ne’e naruk hotu tiha mak akontese kongresu nasionál ne’ebé markasaun loron kongresu dalimak, Fretilin sei akontese durante loron tolu hahú iha 08-10 setembru 2022. Tanba ne’e hosi KNPO harii tiha ona komisaun organizadora agora hala’o servisu preparativu sira la’o hela hanesan reuniaun dala haat ona no espera katak buat hotu prontu bele semana ida-ne’e konvokatóriu (konvite) sei sai atu ba hala’o kongresu nasionál,” nia dehan.
Delegadu mai kongresu nasionál ne’e iha grupu rua hanesan ida bolu delegadu por inerensia funsaun mak hanesan atuál Prezidente Partidu, Sekretáriu Jerál, membru komite sentrál, komisaun nasionál juridisaun, sekretáriu jerál OPMT no sekretáriu jerál juventude Fretilin.
Maibé iha mós delegadu ne’ebé komisaun polítika nasionál sei deside. Ezemplu koordenadór komisaun polítika munisípiu, kuota ida ba reprezentante OPMT, kuota ida reprezentante juventude Fretilin, kuota ida ba antigu kombatente luta libertasaun nasionál militante Fretilin nian, reprezentante organizasaun filiada, organizasaun profisionál reprezentante, organizasaun ativista reprezentante, ho sira seluk bele tama mós sai delegadu, maibé bele iha mós delegadu ne’ebé eleitu ka eleje hosi konferénsia munisipál no postu administrativu.
“Ne’ebé, estimasaun hetan konvokatóriu delegatu atu tuir kongresu nasionál prevista 700 ka 900,” nia hateten.
Jornalista : Nelson de Sousa
Editór : Cancio Ximenes
