iklan

DESPORTU, HEADLINE, LIQUIÇÁ, MUNISÍPIU

Membru PSHT na’in-547 tuir ezame, KRAM husu garante disiplina iha organizasaun

Membru PSHT na’in-547 tuir ezame, KRAM husu garante disiplina iha organizasaun

Membru PSHT ne'ebé tuir ezame ikus iha Postu Administrativu Bazartete Munisipiu Liquiça.Iimajen/Hortencio Sanchez

LIQUIÇA, 18 jullu 2022 (TATOLI)– Membru organizasaun Persaudaraan Setia Hati Terate (PSHT) hamutuk na’in 547 hosi Postu administrativu Bazartete, munisípiu Liquiça, sabadu ne’e, tuir ezame ikus hodi prepara ba tuir graduasaun iha agostu mai ne’e.

Hosi númeru ne’ebé iha kompostu hosi suku sia ne’ebé lokaliza iha Postu administrativu Bazartete hanesan, Ulmera na’in 119 kompostu hosi mane 91 feto 28, Tibar 180 feto 50 mane 130, Leorema 78, mane 60 feto 18, Fahilebu 18 mane 16 feto rua, Lauhata 58 mane 48 feto 10, Fatumasi 60 mane 50 feto 10 no Mau-meta 34 mane 27 feto hitu.

Ho nune’e, Sub Komisaun Reguladora Arte Marsiál (KRAM), Munisipiu Liquiça Silvino Ribeiro dos Santos mós husu ba membru ne’ebé tuir ezame ikus ne’e atu haluha tiha hahalok ne’ebé mak halo iha tinan sira ba kotuk, nuneé bele tau hahalok ne’ebé di’ak hodi hakat ba oin.

“Husu ba alin sira ita ka’er liu mak disiplina iha organizasaun no rona ita boot sira nia lideransa iha organizasaun nia laran,” Responsavél ne’e sujere.

Tanba iha organizasaun nia laran iha doutrina ne’ebé kompletu, nune’e tama organizasaun la’ós atu kompete malu, maibé halo di’ak ba ida-idak nia-aan iha sosiedade no nasaun.

“Ha’u husu ita boot sira atu asegura organizasaun nia naran atu organizasaun nia naran morin fali iha Liquiça no Timor laran tomak,” nia fó hanoin.

Iha biban hanesan, Komandante Polísia Nasionál Timor-Leste (PNTL) Eskuadra Bazartete, Manuel Maria dos Santos, bainhira partisipa iha atividade teste membru foun PSHT, iha kampo Pala Munisipiu Liquiça, husu ba komisaun ne’ebé fó-ezame ba kandidatura membru foun sira ho di’ak no rigorozu.

“Husu ba panitia sira atu fó ezame ba membru foun sira ne’e ho di’ak no rigorozu atu membru atu iha responsabilidade ne’ebé maka’as hodi kontribui ba pás no estabilidade,” Komandante ne’e hateten bainhira partisipa iha atividade teste iha kampu Pala Munisípiu Liquiça foin lalais ne’e.

Entretantu, Reprezentante membru PSHT estrutura nasionál hanesan Warga senior, Benancio dos Santos ho tinan graduasaun 1991 hateten, ezame ne’ebé hala’o espesiál ba PSHT ho laran kontente halo ezame ida ho legalmente hodi re-integra PSHT ba sosiedade.

“Ita kontente bele halo ezame ida ne’e, husu ba panetia sira atu haree didi’ak ho disiplina atu fó teste di’ak ba kandidatu foun sira,” nia dehan.

Tuir dadus ne’ebé iha membru PSHT foun ne’ebé atu simu graduasaun iha tinan ne’e hamutuk 9.000-resin iha territóriu nasionál no graduasaun sei hala’o iha fulan agostu nia laran.

Notísia rekevante:  Agostu, PSHT halo graduasaun ba membru foun 9.000-resin

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!